SHILLONG: Faculty-o 35 percent-ni gita komianiko chagronggenchimoba Shillong Medical College-ko ta·raken a·bachengatna jotton ka·enga.
Health Minister Ampareen Lyngdoh, mejaomangmang Medical College-ko nirokeaha aro National Medical Commission (NMC)-ni nirokangani ja·man gital rikenggipa medical college-o staff-rang chu·ongja aro maidakgipa infrastructure-ko nangkuenga iarangni gimin parakaha.
A·songni gipin bakrango donggipa sorkari medical college-rangko niatgenchimode mitamrang teaching staff-o 47 percent-ni gita chu·ongmanjagenchimoba college-ko a·bachengaha, indiba Meghalaya-ko niatode bilongen nambata gadango ong·a.
Uandake sorkari doctor-rangko academic-ni role-ona jitatskana tik ka·anio adita ra·bianirangko chagrongengon Lyngdoh, ia mamlako sorkari name daken nirokenga ine aganaha.
Doctor-rangko uamangni clinical kamrangoniko ra·gale skie on·aniona rimbagenchimode rural aro urban healthcare centre-rango bilongen neng·nikanirangko man·skagen. Uni gimin Primary Health Centres (PHCs), Community Health Centre (CHCs) aro gipin centre-rango medical practice ka·giparangni kam ka·ani bewalrangko name dake nirokchengna nanggen ine Lyngdoh agankuaha.
Gital rikenggipa medical college-ko ia academic session-ko a·bachengna man·genma man·jawa iani gimin jajrengengon Lyngdoh, pilak manderangko gisikko ka·sinate dongchina mol·molaha. A·dok sorkari aro NMC, college-ko ta·raken a·bachengna cholrangko nienga ine ka·dongataha.
Meghalaya-ko, sorkari medical college dongsranggijagipa a·dok ong·atjawa. Minggipin beben a·dokni healthcare system-o medical professional-rang komigenchimoba, mikkangchina nambata health infrastructure-ni bidingo chanchie kam ka·enga ineba Minister agandapaha.
