Tura: Garo hills autonomous district council (ghadc)-o kam ka·enggiparang ja 42-ni dormaharangko man·tokujaengani gimin an·tangtangni kamrangko dontongate salbongana chong·motan July 7-oni 11 tarikona uamangni man·gni dormaharangko komibeoba bilsisani dormahako on·china dabie asonge jingjengataniko dakangaha. Iarangni gisepon uamangni salbongana jingjengatani gittamgipa salo ghadc-ni chief executive membor (cem) Albinush Marak, non gazeted employee association (ngea))-ni dilgiparangko okamatenba uamangni jingjengataniko dontongchina mol·molaha. Indioba uni okamate jingjengataniko dontongchina agananiara ghadc-ni namgninasan aganaha indiba kam ka·enggiparangna dormaha on·ani giminde maming ku·rachakani dongja.
Uni gisepon uamangni jingjengatani salbonga gappilonaba uamangni dabianiko on·a gita maming ku·rachakaniko on·jani gimin GHADC-ni Non Gazetted Employees Association re·baenggipa antioba Sombar salonin jingjengataniko dakangkuna tik ka·aha ine ngea- ni president Brithen M Sangma u·iataha. Indake ong·genchimoba mikkang antide salgittam chutti dongani gimin uamang salgninasan jingjengataniko dakangaigen, uni ja·manba GHADC o kam ka·enggiparangna dormaha on·ani bidingo GHADC ni executive committee maming ku·rachakanirangko on·jagenchimode apsan daken salbongana sit-in demonstration-ko dakangkugen ba jingjengatangkugen ine u·iataha.
