A·chik Contractors Union-ni tom·bimonganiko Tura Nokma Council-o ong·atanga.

Tura:Garo Hills-ni A·chik contractor-rangni neng·nikanirangko man·engani bidingo tom·e chanchirimanganiko dakangna gita,  A·chik Contractors Union-ni General Meetingo-ko, West Garo Hills a·jani-ni Tura, Nokma Council-o ong·atangaha . Ia tom·anio, A·chik Contractors Union-ni President Carry Ch. Marak, Vice President Blan Clever N. Sangma, General Secretary Rollingstone Ch. Momin unikoa, Joint Secretary Rakseng R. Marak, mongsonggipa sokgipa ong·e tom·aniko dilangaha. A·chik Contractor Union-ni dilenggiparang baksana ia tom·anio, Association-ni Executive member-rang aro dingtang dingtang district-ni A·chik contractor-rangba re·bae bakko ra·angtokaha. Tom·anio,  association-ni dingtang dingtang nangchongmotgiparangni gimin chanchirimangengon,  Garo Hills-o A·chik  contractor-rangni ka·e su·e cha·enganiko namdapatanina aro jatni janggi tangani gadangko dingtangatna miksonge ku·cholsan ong·e ja·kurangko de·e kamrangko ka·na aro mikkangchi dedrangrangna chanchisoe re·mikkangna miksonge ia association-ko a·bachengataha ine Secretary, Rollingstone Ch. Momin  jinmana u·iatangengon, apalchini rebagipa contractor-rangko raken jegalsoaniko dakna nangchongmotengani gimin aganangenba, adita department-rangni kosako Right to Information (RTI) ka·angaha aro mikkangchiba iandakgipa Department-rangni kosako RTI ka·angkuna tik ka·e ra·angha. Una agreba, contractor-rangni  chagrongna nangenggipa neng·nikarangni gimin chanchirimangskaengon, A·chik a·songo bang·a qualified contractor-rang dongani gisepoba, gipin a·songrangoni  gipin jat ba rorirangsa re·bae bang·a contract-rangkon jako ra·e kam ka·engon ian A·chik ba local contractor-ni kosako,  jako ra·e kam ka·enggipa dingtang dingtang department officer-rangni onchepe dakani aro local contractor-rangni kosako mikkang nitee dakaniba ong·a, jean local contractor-rangna ra·chakna man·gijaniba ong·a ine Vice Predsident  Blan Clever  Sangma aganangaha. Una agreba,  A·chik a·songo bang·a manderangan iandakgipa kamrango  pangchake janggi tanggiparang aro nokdangko chalaigiparang ong·ani gisepo, Garo Hills-ni bang·a A·chik  contractor-rang nokdangko chalaianio, dingtang dingtang neng·nikanirangko man·a nangengani giminba parakangaha. Uni gimin iandake jattangni kosako mikchepani aro mikkang nite·e dakaniko man·jana gita mikraksogiparang ong·e,  mikkangchi A·chik a·songni silroro namroroanina  apsan nangrime rake kamrangko ka·na man·a gita A·chik Contractors Union-ko mikkangchi bilakbatatna kang·kare kae ra·engon apsan ja·kurangko de·pachina  jinmako  ku·pattiangaha.