Tura: Garo Hills a·ja gimiko indiba mongsongbate North, East aro South Garo Hills district-rango dingtangmancha Primary aro Upper Primary gadangrango skulrangna rika cho·anirang baksa baditaba chasongrangna neng·skimaniko man·enga, re·baenggipa bilsirango namgnirangko man·angna nichaksoanirang indin ong·gramaiaha.
Maiko dakna nanggipa ong·a sorkari maming u·iataha dongja aro uamang nokrangko rik cho·anio contract-rangna on·an baksa namatna cholrangko ra·baa indiba mitam skulrangnasan ong·aia, ine gitcham CM aro Opposition-ni dilgipa Dr. Mukul Sangma iarangni bidingo aganangaha.
“House-ni bang·a tom·anirango bang·a seoka man·giparangchi iani bidingo agangrikaha. 2022-23 bilsioba Primary aro Upper Primary education rika cho·ani aro mande bil minggnina ja·ku de·an baksa neng·nikanirango gisiko nangen agangrikahachim. Mitam skulrang tusienga, mitam skulrang nokking sela aro wachi karini somoio class ra·naba tarie on·ja aro mitam skulrango skigiparang chu·ongja. Maina 90%-ni gita sorkari LP School-rang indakgipa a·selrango ga·akenga anga sandina jotton ka·aha,” ine Mukul aganaha.
Bang·a skulrangko anga nikaha mitamrang ong·telaigipa a·selrangchi nosto ka·ako man·aha aro uarangko somoi gita tarijani a·sel nosto ong·bataha, ine ua aganaha.
“Biaptango iarangko namatna man·a ia miksonganina daito nanggiparangko sing·dona nanggipa ong·enga aro jekon niamni gita dakna nangtelanichi ge·eta. Uarang ong·telaigipa a·selrangchi nosto ong·a ong·ode iarangna disaster management plan-ni biapo dakchakanirang donga aro SDRF-ni ning·o chamgimin tangka paisarang donga. Maina iarangko jakkaljaenga ian sing·dona nangani ong·enga. Aro mitam skigiparang nosto ong·giparangko report on·a man·ja ong·ode batesa iarangna uamang kusi ong·atbata. Uamang class-rangko ra·na nangjawaha aro kamtangko dal·e ra·gija donga,” ine Mukul aganaha.
Ua uni MLA scheme (SRWP)-ko uni constituency-ni skulrangko taridapna jakkalenga indiba ua jedakgipaoniko ua tangka paisarangko koros ka·na man·a ong·ode ua uni a·jani namroroanina jakkala, ian uamangna rakbatgipa kam ong·a, ine gitcham CM aganaha.
“Angni constituency-o chinga iako daka indiba ian a·sel ong·anio chagrongao pangchaka, anga iani bidingo talbatatna sikja,” ine ua aganaha.
“East, South aro North-ni bang·a ritcha skulrang da·o sulsul dake rika cho·aniko dakanganina neng·nnikaniko chagrongenga. Ia neng·nikanirangna contract-rangna rural aro semi rural biaprango contituency ge·prako damgni skulrango namroroanina rika cho·anina tangka lak 39-oni lak 44-ni gisepgriko tarina on·an baksa sorkari namatani cholko ra·baaha. Indakgipa ge·50 constituency-rang donga, ge-100 skulrangko tang·doatataha, an·chingo indakgipa skulrang dam 1000 donga. Mitamrangko mai dakno,” ine batanggimin antio interview ra·ani somoio Mukul sing·doangaha.
Skul ge-prakna nok building rikna lak 38 ba 40 tangka botana bate tangka lak 1.5 ba lak 2-mangmango taridapangpilani bidingo House-o sorkarina ua ku·pattiaha ine ua agandapangaha. Ian class-rangko chu·onga gita name dake taipiltaina dakchakgipa ong·gen jedakode chatro chatrirang uamangni skie ra·aniko wachi karini somoioba gimaatjawa. Uni agananiko ku·pattiani dake sorkari ra·chakaha indiba da·ona kingkingba kam ka·a dongja, ine ua aganaha.
Ua mesokna gita Asian Development Bank (ADB) minge aganaha, jeon skang Congress sorkari rikani somoio human capital development-o skanggipa tangka botaha indiba gital ge·sa tarigipachi donmitapataha.
“Ia sorkarini gita batanggimin bilsi 5-o gimaaniko man·aha jeon da·o dakna nangagipao niangenga. SSA rika cho·anina fund-rangna bang·a tangka paisako man·a na·a nichaksoenga. Nangana bate tangka paisarangko man·genchimoba ia sorkari iako jakkalna changjaha.Ia program-o SSA, RMSA-ko chanchapataha jeon jakkalna man·gen. da·o sorkari rikenggipani gita ia bilakgipa sector-na kam ka·arang chu·ongja aro kam ka·na changja,” ine AITC-ni dilgipa aganaha.
