Gitcham MDC, AMPT rama namjani gimin matnanga

TURA: Agia-Medhipara-Phulbari-Tura (AMPT) ramako taridapenggipa kamrang Phulbari aro Rajabala-ni gisepgriko namsrangja ine Garo Hills Autonomous District Council (GHADC)-ni gitcham MDC Sofior Rahman matnangaha. Ia ramako tarienggipa engineer-rang name dake on·na nangarangko chu·onga gita on·jani a·selo a·kilok dakenga uandaken mikka wao a·dubek daka aro sal rako a·dakengani a·sel salantio nanga kamna songreenggipa manderangna somai gita sokna man·jae neng·nikaniko man·enga. Indake jakaltogija ramako tarienganira mandeni be·en bimangni an·seng baljoke donganiba kenchakna nangani ong·a, maina salanti ia ramako garirang re·ruraengani gimin a·dimu ong·kate asthma aro allegies sagiparangna rang·sitanio neng·nikaniko man·a. Salanti nanga kamna songreenggiparangna aro skul bi·sarangna mikron nianirango man·dikataniko man·a aro saknaako man·enga. Uarangsan ong·aija ia rama namgijani a·selo game cha·giparangna, badingchiwale cha·giparangna aro jolni manderangna ru·utataniko man·a ineba Rahman aganangaha. unigimin iandake namgija rama tarianiko dontongchina dabienba ia ramako tariani korosrangko contractor-ko aro supervising official-rangko maming donuani gri name aro jakaltogipa ong·e tarina nanga ine dabiangaha. Uni agananani gita ia ramani gimin badi ka·anirangko PWD (North Division) Tura maming talatani dongjaode, State Vigilance Commission aro Anti-Corruption Bureau-na Badi ka·angna skang jinma jingjengatanggen ine gitcham MDC Sofior Rahman mikrakataha.