TURA: Re·baenggipa 2027 bilsio chang 39-gipa National Games-ko Meghalaya a·doko sokachakna am·engon, uanona tarisamsoanirangko dakani bidingo chanchirimna gita Meghalaya Taekwondo Association (MTA)-ni Sonibar salo Tura-ni Ringregittim-o tom·aniko ong·atangaha.
Ia tom·anio, West Garo Hills, North Garo Hills, West Jaintia Hills aro East Khasi Hills a·jani executive membor-rang re·bae bakko ra·aha.
Indake ia National Games-na kal·susagiparangko maikae nambate seokna man·gen, badita sakko susaatgen, unbaksana district aro state level-o Taekwondo-o susaanio age/weight category-rangni bidingo tom·anio chanchirimangaha. Taekewondo-o susagiparangko, seokani aro uamangna training on·anirang mitam a·dokrango matchotangmanaha aro July jaoni September jaona kingking iako dakangkugen ineba official-rang tom·anio chanchirimaha.
Ia National Games-na susagiparangko seokengon, ia Meghalaya a·dokni bimingosa kal·engani gimin chu·sokgipa aro nambatsranggipa kal·susagiparangkosa seokna ga·akenga, jedakode uamang gipin a·dokrangoni re·bae susagiparang baksa nama bewalo susagrikna man·gen, MTA parakaha.
Unomitingo, kal·susaanirangko nambata aro kragipa gadango tarisamsoanirangko dakna man·a gita dingtang dingtang district-ni unit-rang baksa MTA nangrimenba raken kamrangkoba ka·enga ineba Association parakaha.
