KHARKUTTA: Tura-ko Winter Capital songchina dabienggipani bidingo manderangna talatanirangko on·na aroba manderangni bakrimaniko man·na gita A·chik State People’s Front (ASPF)-ni gita re·anggipa Sonibar salo, North Garo Hills a·jani Karkutta Reserve Playground-o ong·atangaha.
Indake ASPF-ni General Secretary Bernita R. Marak, Garoland State Movement Committee (GSMC) Hq. Tura-ni Acting Chairman, Balkarin Ch. Marak, GSMC, Resubelpara-ni General Secretary Robith Ch. Marak, Organising Secretary Challang G. Momin, una agreba Unit-ni dingtang dingtang dilgiparang baksana dam 36 songni Laskar-rang aro songni manderang ia tom·anio bakko ra·angaha.
Tomanio, Winter Capital-ni gamchatani aro uni namgnirangko ASPF-ni general secretary Bernita Marak tom·bagipa jinmana talate on·angaha.
Jensomoio Meghalaya, Assam State-o ong·engmitingo, Assamese ku·sikkosa dingtang dingtang nanganirangna nangchongmotgipa dake ra·gataniko ra·chakna man·jae dingtang A·dokna dabiaha, aro uagitan 1972 bilsini January 21 tariko Meghalaya A·dokko man·aha aro ua somoio skanggipa Assembly tom·aniko Tura-ni Garo Hills Autonomous District Council (GHADC)-osa ong·atchengaha, Marak aganaha.
Indake ua tom·anio, Khasi, Jaintia aro Garo jatgittamni dilgiparang apsan ku·monge, Meghalaya a·dok gimikon apsan namroro silroroaniko tikatna man·na gita, Shillong-ko Summer Capital dakna aro Tura-ko Winter Capital dakna ineba a·dokni gitcham dilgiparang tik ka·ahachim, ASPF dilgipa aganaha.
Indake ua salrangonin miksonganirang donggenchimoba da·alona kingking chu·sokate on·kujaengani giminsa, Tura-ko Winter Capital songchina dabienga ine ASPF-ni general secretary Bernita Marak jinmana talate on·angaha.
Da·alo A·chik A·songni ku·monganichi adita a·dokna nanganirangko chu·sokatna man·engon, Winter Capital-na dabianikoba chu·sokatna gita kimkiro bilake ja·kurangko ga·na ineba Marak A·chik jat sakantikon ku·mongaha.
“A·chik A·songna nanganirang bang·en gnang aro uarangoni Winter Capital mingsa ong·a. A·chik chadamberang gisik wa·sagipa mikkangchini gimin chanchigipa ong·a, maina knalna niksamsoe kam ka·aniara dedrang-su·drangona namgni ong·gen. Unigimin A·chik A·songni mande sakantian hai an·chingni dabianiko be·en pil·atna gita apsan jak on·na” ine GSMC-ni Acting Chairman Balkarin Ch. Marak didianiko on·aha.
