SHILLONG: Nongmensong-o BSUP Housing Complex-o smart meter-rangko tekangani ja·man complex-o donggipa manderang bijolini bill-rangna neng·nikaniko chagrongani bidingo Mongolbar salo Nongmensong Unit-ni Khasi Students Union, Power Minister, AT Mondal-ko mol·molaha.
Nongmensong-ni BSUP Housing Complex-o pre-paid smart meter-rangko nokantion tekaonin nokantionan bijolini tangka bill-rang bang·e soktokaha ine KSU aganaha.
Smart meter-rangko housing complex-o donggipa manderang baksa agangrika ba u·iatchenga gri tekangtokaha ine KSU aganaha. Complex-o donggiparang skango tangka 500 ba 600 dakesan gamaiachim indiba jensalo gital smart meter-rangko tekangaha, da·ode nokantian janti bijoli bill komibeoba tangka 2000-ko gamenga, ine ua agandapangaha.
Iarangni bidingo ua niatgen aro re·baenggipa antio nipilaniko dakani somoio sandianggen ine Power Minister, AT Mondal aganaha.
“Iani bidingo chinga niatgen aro dingtanggrikaniko nina ge-2 meter-rangko chinga nigrikanikoba dakgen,’ ine ua aganaha.
A·dokni lak 6 jakkalgiparang smart meter-rangko telna nanggen aro iako dingtan dingtang gadangrango a·dokni dingtang dingtang bakrango tekanggen, ine Minister agandapangaha.
Ong·gija bill-rangni mamlao smart meter-rangni gita bill ka·aniko dondipatna agangen,’ ine Mondal aganaha.
