Mikka wajaode load shedding-na kensoani donga
SHILLONG: Adita somoirangna a·doko mikka bitchirang ran·changengani a·sel, Umiam reservoir-ni chirang ta·raken komiangengani gimin Power Minister, AT Mondal jajrenganiko parakaha, jeoniko bijolirangko bikotenga.
Mikkarang wajaengani gimin Umiam-ni chi meja July14 tarikon 3182 feet-ona tang·onahachim.
“Umiam-o chi komiangjokon chanchina nangani ga·akaia aro da·o anga gipinrangna bate sko sabatengjok” ine Power Minister koborni manderangna aganaha.
Obostarangko MeECL nirokenga maina bijoli bikotjokon chini gadang tang·onangaia, Mondal aganaha.
Chi komiangani gimin uni sko sasoani kattarangko agananina, load shedding ka·genma ine sing·anina aganchakengon, da·ao dipetode bijoli siatani giminde mamingkon aganna man·kujawa, maina da·o dipetode namen cholikuenga ine power minister aganchakaha.
Unigisepon, “wachikkarini mikka badita somoina ran·changgen, uanosa load schedding ka·anide pangchakgen, maina bijoli bikotaniba mikkaosa pangchaka” Mondal aganaha.
Ganol Hydro Power Project-onikoba 22.5 MW-ko bikotenga aro wachikarina skangba 24 MW-ko bikotaha.
Indake adita jarangna skangde Umiam lake-o chi gapsuakachim indiba da·omiting mikka bitchi ran·changengani gimin Umiamni chi ta·raken komiangengaha ine nikna man·a. Unomitingo Umiam-o chi chu·onga gita dongjaode a·doko load shedding ka·aona sokgen ineba nikatsoenga.