TURA: North Garo Hills Dainadubi jolni manderang adita salrang skangsan jinma tom·dake chanchirimaniko dakangaon Bangsi A·pal Higher Secondary School-o degree college-ko rikna dabiangaha.
Tom·anio jolni manderang apsan ong·e chanchirimangaha aro joltango chagrongenggipa neng·nikarangni gimin authority-na u·iatna tik ka·aha. Aro ua jolo degree college-ko nangengani gimin chanchirimangaha. Iana jolni manderang Dainadubi College Demand Committee-koba songaha, jedakode ia dol, jolna college degree-ko dabianio kamrangko ka·anggen.
Tom·anio, Gilsang D Shira-ko committee-ni president songaha. Watson Marak-ko vice president, Jaffrey Momin-ko Secretary, Tesrang Sangma-ko Joint Secretary aro Omillo K Sangma-ko Adviser songaha. Iana agreba sak 10 gipinrangko executive memborrang seokangaha.
