GH-ona niamgri songdonggiparangni kosako Assam-o daka gita ja·ku de·china Youth Congress ku·pattia

TURA: Assam a·doko da·o niamgri songdonggiparangko a·rikgalanio Garo Hills- a·jaona Assam Goalpara-oni a·rikgalako man·giparangko napani chol donga uni bidingo ja·ku de·samsoe Assam-o jedake dakenga uandake champengsoaniko dakchina Superintendent of Police baksana district administration-ni gita ja·ku de·china dabiangaha.
Indakgipa a·selrang ong·ja gita champengsona naljokani ja·kurangko de·na nangchongmotako committee, West Garo Hills a·jani Deputy Commissioner-na aro Superintendent of Police-na dingtangtee mol·molani on·aha.
“West Garo Hills District-na Goalpara-ni geographical biaprangko mesoke on·aha aro nirokgijagipa sima ari biaprangkoba talate on·aha, chinga kenchaksoa iano bang·a a·rikgala man·gipa manderang napna jotton ka·gen aro an·chingni district-rango niamgri songdongkamna jotton ka·gen dingtangmancha Assam baksa nangrimgipa sima ari biaprangona kenchaksoa. Ian dingtangmancha adminsitrative-ni gisiko nangna nangenggipa ong·enga, joltangni gamjinrangni bidingo chanchina nangenga, songsuln noksul tom·tome donggipana golmalko ra·baenga aro niam reti-ni mamlarang iarang gimikko man·chape neng·nikaniko ra·baniona sokgen,” ine committee aganaha.
Sima ari donggipa gimik songrango aro napchakramrango dondipgija nirokna aro patroling re·china committee ku·pattiaha. Sima ari songrango a·gital ong·e donga ma·sia ong·ode joltangni songni bil man·giparangna aro niamko jarikgipa agency-rangna koborko on·pachina, Assam administration  baksa bakriman baksanaba niamgri songdongkamgiparangko ra·chakna man·gijanina am·sandianiko dakna nanga aro ID-rangko sandina nanga.
Assam aro Meghalaya a·dok baksa sima arirango patrolling aro nirokanirangko bilakdapatchina Police-ni Chief-koba apsan somoio committee mol·molangaha, manderangni a·dokona napbaenganiko nina aro am·sandina napchakram ramarango chel·chakgipa dolko done sandichina, Assam police baksa bakrimchina aro niamgri songdongkamgiparangni dongako ma·sia ong·ode songni Nokmarangna aro community dilgiparangna aro songni bil man·giparangna u·iatchina mol·molangaha.