Sam bringipa baringbelati-ko cha·mane Mairang-ni me·chik bi·sa sia

SHILLONG: A·doko gama ge·anio jakkalenggipa chemical bosturangna kena nanganirang baririkrikenganio pesticide bringipa cha·aniko cha·mane bilsi 15 ong·gipa Shailynti Marngar sina nanga ine chanchichipenga.
Mairang block-ni ning·o ga·akgipa Mawriang Tyrnai songo donggipa me·chik bi·sa July 13 tariko baringbelatiko cha·manani ja·man siaha je baringbelatio toxic pesticide-rang aro fungicide-rang baksa donggipako cha·mana nanga ine bebe ra·aha.
A·dok gimiko baringbelatiko ge·enganio saknaatgipa chemical-rangko on·enganio sandianiko a·bachengatna ku·pattiaha ine Health Minister Ampareen Lyngdoh, jean Agriculture and Farmers’ Welfare-nikoba jako ra·e kam ka·engachim parakataha.
Gama ge·anio baditana samrangko jakkalna nanga uarangna naljokaniko on·a nanggiparangko ja·rika gri a·sel ong·gipa nokdangni manderang mamingko u·igija gama ge·aniko dakenga ine am·sandigiparang man·aha.
Non-organic a·salrangni rokomrang aro pesticide iano dongpaama iako dingtangmancha ma·sina departmental officer-rangoni chu·gimikko report-ko sengenga. Chutirang ong·ani a·sel name dake am·sandiangna man·jaha indiba da·o uamang gisiko nangangenga ine aganaha ine Minister ma·sichake aganangaha.
Bilakgipa chemical bosturangko on·angani ja·man sal 7 ba sal 10-na mesu samjakrangko ba bolam biterangko cha·jachina ba paljachina gamgipa ge·giparangko ge·etgipaba donga ine Minister talatangaha. Ia mamlao, bisi gnanggipako cha·mangipana simsaksona on·gipa somoio ua joljol cha·manahakon ine minister aganaha.
Skango jedake maming samrangko bringgija ge·aoniko dakjani bidingo ua gisiko nangbate aganaha, Meghalaya-ni ong·telaigipa jatni dakbewalo gama ge·ani bosturangko bang·bate ong·katatna sinjetaniko on·dapenggiparangko Lyngdoh mikrakataha. Be·en bimangni an·seng-baljokanina chanchie naljokgipa aro dakrongbewal method-rangona re·bapilchina game ge·e cha·enggiparangko ua didiangaha.
Shailynti uni jonggipa baksa nokon ong·engachim jensalo ua rang·gitik saaniko man·aha. Uko Nongum PHC-ona ta·rake ra·angna jotton ka·aha indiba ua sokna skang ramaon siaha. Uni ma·gipa pagipa aro nogipa jonggiparangba baringbelatikon cha·aha, bisi gnanggipa cha·aniko cha·manani chinrang dake saaha aro uamangko sepangbatgipa community health centre-o sanengaha.
Report-ko man·soahaon champengani kamrangna rakgipa ja·kurangko sorkari de·gen ine minister aganaha. Naljokgipa cha·aniko cha·na ranta ka·gijanina ian mikrakatgipa dake ia a·sel ong·gipan mesokaha ine ua aganaha.