TURA: West Garo Hills a·jani a·kawe jolrango ka·gipa Jal Jeevan Mission (JJM) project-rangni bidingo Balachanda-ni gitcham MDC Sofiur Rahman sing·doatenba, ia project-rangko Hyderabad-ni BAC Infratech company-na mikkang nitee on·aha ine matnangataha.
Rahman-ni parakatani gitade, West Garo Hills a·jani a·kawe jolrango ka·gipa bang·bata JJM project-rangan chu·sokgipa ong·jaha aro iani bidingo ua Jal Shakti Minister-na badi ka·e sedoataha.
“Sorkarini see rakkianiko parakani gitade, a·kawe jolrango JJM-ni kamrangna gong kror 1000 ong·na sipile tangka paisarangko chamataha aro korosba ka·aha indiba kamrangko nigenchimode 20 ba 30 percent-ni gitasan matchotaiaha aro bang·bata nokdangrangan chi pipe-rangko man·tokkujaenga,” ine Rahman seachi parakataha.
Bang·bata project-rangon bill-rangoni 90% ong·na sipile tangka paisarangkode contractor oke ra·aha indiba kamrangko matchotgija galchipaiaha ineba gitcham MDC matnangataha.
JJM dashboard-o tol·gipa report-rangko on·aha ine matnangatengon, “JJM dashboard-ode kamrangoni namen dingtange report-ko mesokaha aro je songrangon JJM-ni chirangko man·kujaengachim, ua songrangkoba man·aha ine mesokaha. Ian ma·mong sorkari aro manderangko cha·bokna jotton ka·anisa ong·enga,” ine Rahman parakataha.
A·kawe jolrango JJM-ni bang·bata project-rangkon BAC Infratech company-na on·aha indiba uamang kamrangko name ka·jaha ineba Rahman matnangataha.
“BAC Infratech Pvt Ltd aro dingtang dingtang contractor-rangko uamangni kamrangna rim·ani pal PHE department, uamangko chel·chaknasa matchotani somoiko ra·dodaproroe on·enga aro ian kraani ong·ja. Bang·bata biaprangin pipe-rangko chate on·gija galchipesa donenga. Mitam biaprangode JJM-ni beneficiary ine segatako man·gipa songni manderang bang·batan chi tingtotsakoba man·kujaenga,” ine Balachanda-ni gitcham MDC parakataha.
JJM-ni kamrango contractor-rang aro PHE official-rangni gisepo jak donga ineba Rahman matnangataha.
“JJM-ni bang·bata project-rangon ong·gija dakanirang dongani gimin changni chang Deputy Commissioner aro PHED official-rangna badi ka·doahachim indiba maming ja·kurangko de·chipjaha,” ine Rahman parakatenba, iani bidingo CBI-chi sandirokatchina dabiangaha.
Iandake matnanganirangko man·engani gimin BAC Infratech company-ni official-rango sing·sandiatskaon, kamrangko ka·anio dingtang dingtang neng·nikanirangko chagrongna nangengani a·selsa kamrang matchotkujaenga ine talataniko on·atskaaha.
“Chinga ia project-rangko galchipna man·ja aro chingni manderang, kamrangko somoi gitan matchotatna rakbee kamrangko ka·enga. Mongsonggipa pipe-rangko salaniosa chingni PWD aro dingtang dingtang department-rango mol·molanirang ja·manchakatako man·e, ia kamrangoba ja·manchakatako man·enga. Nokdang ge·antionan chirangko sokate on·na chinga kamrangko ka·enga,” ine company-ni official saksa parakataha.