Mitam dilgiparang district council-ko bon·atna miksongenga: Bernard

TURA: A·chik politician-rangoni ja·delbatsranggipa dilgiparangoni saksa Meghalaya a·doko district council-ko bon·atna miksongani dongachim aro iani a·selsa da·alo Garo Hills Autonomous District Council (GHADC)-ko chalaianioba neng·nikanirangko nikna man·enga ine Robibar salo, Tura-ni MDC Bernard N Marak parakataha.
Marak-ni parakatani gitade, iani bidingo GHADC-o Executive Committee (EC)-ko chalaienggipa mitam MDC-rangoniba, district council-o kam ka·giparangna aganmanaha maina GHADC-ko chipe donna gita mitam MDC-rang, kam ka·giparangna ku·watmanaha.
“Kam ka·giparangna ja 42-ni dormaharangko on·gija donaniara GHADC-ko tangka jakkalsretgipa aro kam cholijaenggipa ine mesokna miksongmanchae dakanian ong·a. Kam ka·giparangna indita jarangni dormaharangko on·na man·jaengani a·sel sorkario bak ong·pagijagipa MDC-rang aro nokdangrangko man·chape hajalni hajal manderang neng·nikanirangko chagrongna nangtokengaha,” ine Marak parakataha.
GHADC-o tangka paisa jakkalsretani, kajinarangko man·anio noksan ong·ani aro kajina man·gipa department-rangko a·dok sorkarina on·ani bidingo ua changni chang u·iatahachim ine janapatengon, indita mikrakatanirangko on·ani ja·manba GHADC-ko chalaienggipa EC, maming ja·kurangko de·chipjaha ine Tura MDC matnangataha.
“EC-ko chalaienggipa MDC-rangni gangbo dakani, bamna sikgijani aro kam cholijani a·selan da·alo GHADC-ko chalaianio neng·nikanirangko man·na nangengaha. Ia neng·nikanirangko namatani bidingo anga GHADC-ni session-rangko ong·atanio dingtang dingtang cholrangko ku·pattie on·ahachim indiba ia ku·pattianirangko EC knachakna gisik nangjaha,” ine Marak parakataha.
GHADC-ni kajinarang aro tangka paisarang baksana ma·mong sorkarini gitaba krorni kror tangka paisarangko on·atahachim indiba ia tangka paisarangoni 40 percent-de gimaahna ine janapatengon, ia pilakan EC-ko chalaienggipa MDC-rangni tangka paisarangko skatang jakkalani aro cha·ani a·selsa ong·aha ine Marak matnangataha.
“EC-ko chalaienggipa MDC-rangni chu·sokgijanirang Garo Hills-ni manderangna mikrakatani ong·china maina GHADC-ko chalaianio kamrang chu·sokjasan ong·jaenga indiba district council-ko miksongmanchaen nisigalenga,” ine Tura MDC parakataha.