SHILLONG: Re·anggipa July 18 tariko Williamnagaro me·chik bi·sa saksako misilpile so·ote galanina Garo Hills gimik so·sojengjenga ong·an baksana, batanggimin antisani gisepon Garo Hills-o sakgittam manderang an·tangtangko so·ote siaha. Indake da·ororo manderangni so·ote sianirangko niatgenchimode, Garo Hills-o counselling centre-rangko bang·en nangenga ine nikatna man·aha.
East Garo Hills-ni Williamnagar saksa so·ote siaha, unomiting Tura aro Dalu joloba sakgni manderangni an·tangtangko so·ote siani koborrangko man·ahao
Koborogita meja Robibar pringo bilsi 42 ong·gipa mande saksa Tura-o uni noktangon an·tangko so·ote siangaha. Unomitingo Dalu-oba saksa bilsi 55 ong·gipa mande, nokdangoni dingtang ong·atako man·ani gimin dukchi pipripako man·enba an·tango so·ote siaha.
Unagre re·anggipa anti Sukrobaro West Garo Hills, Gambegre joloni saksa bilsi 24 ong·gipa me·chikba, uamangni mikcha-ka·saani obostarangni gimin Simsang chibimaona bilone siaha. Ja·mano uni manggsiko sandie man·aha.
