BAGHMARA: Adita salrangna skang, South Garo Hills a·jani Mahadeo New Rompa songo, drae til·ekenba so·ote galako man·gipa me·chik bi·sana kakket bichalko on·china dabienba, jolni dingtang dingtang dolrang, jolo songdongenggipa manderang baksa tom·aniko ong·atangaha.
Koborko on·ani gitade, bilsi 15 ong·gipa me·chik bi·sako re·anggipa July 9 tariko, drae til·ekenba so·ote galahachim. Ia bi·sani manggisiko adita salrangni ja·mansa songni buring damsao, ro·ongrangchi gope galako man·ahachim.
Indake ong·engon, ia me·chik bi·sana aro ia me·chik bi·sani nokdangna kakket bichalko on·china aro dos dakgipa manderangko ta·raken rim·china gita South Garo Hills a·jani dingtang dingtang dolrang dabiangtokaha.
Ia me·chik bi·sani nokdangna, nanga gita tangka paisarangko gamskachina gitaba NGO-rang dabiangaha.
Koborko on·ani gitade, ia a·selni bidingo sandirokna gita South Garo Hills a·jani Superintendent of Police (SP), dingtangmancha Special Investigation Team (SIT)-ko songe on·aha.
