TURA: India aro Bangladesh a·songni simarango niam gri badingsrukanirang batroroengon, Mongolbar attamo Purakhasia-ni police-rang, Bangladesh a·songona badingsrukatenggipa sarirangko rim·rikna man·aha.
Police-rangni u·iatani gitade, pangna dakronga gita police-rang Mongolbar attamni 6:00 bajimango, a·song damgnini simarangko re·roroe nirokengmiting somoio, sari badingsrukenggipa manderang, police-rangko niksoenba, an·tangtangni ra·angenggipa bostarangko ua biapon gale kataha aro ja·mano police-rang, ia bostarangko kulie nion, ia bostarango king 200-na baten sarirangko man·aha.
Indake ong·engon, Budbar pringoba Border Security Force (BSF) sipairang, simarangko nirokengmiting somoio Bangladesh a·songona mang 60 matchurangko salangenggipa truck bolgittamko rim·rikna man·aha ine kobor on·aha.
