TURA: Assam a·doko niam gri songdongenggipa manderangko Assam sorkari a·rikgalengani gimin a·rikgalako man·gipa manderang Meghalaya a·doko katnapna jotton ka·skanaba gnang ine kenchakanirang ong·katengon, Meghalaya a·doko, mongsongbate Ri Bhoi, North Garo Hills aro West Garo Hills a·jarango niam gri napsrukaniko nambate nirokchina Tura-ni MDC Bernard N Marak, a·dokni Chief Minister Conrad K Sangma-ko didiataha.
Assam-o a·rikgala man·e duko ga·akenggipa manderangna dakchakanirangko on·gen ine University of Science & Technology Meghalaya (USTM) Chancellor-ni social media-o parakanikoba Mara kraken jegalataha.
Marak-ni parakatani gitade, Assam a·doko a·rikgalako man·e duko ga·akenggipa manderangko nokchakgenchimode mikkangchi a·dokni Tribal-rangnan neng·nikanirangko ra·baani gita ong·genchim.
“Meghalaya a·dokara Tribal-rangni songdongbatgipa a·doksa ong·ani gimin Sixth Schedule a·jarango gipin jatrangni napdrabae songdong a·chaaniko raken champengna nangenga,” ine Marak parakataha.
A·kawe jolrango donggipa Sixth Schedule a·jarangko da·o Plain Mauza-rang pil·ataha aro niam gri songdongenggipa manderangna niam gri a·a pattarangko on·aha ine matnangatengon, Nokmarangni on·gipa a·arangkoba da·o lease pattaona tariskaaha ine Marak, an·tangni suk ong·gijaniko parakataha.
Tura-ni MP Saleng Sangma-ko man·chape Garo Hills-ni mitam dilgiparang, niam gri songdongenggipa manderangna chakpaanirangko on·enga aro uamangni agangipa kattarangko Garo Hills-ni a·kawe jolrango Tribal ong·gijagipa manderangni gisepo watpripraenga ine janapatskaengon, ian dingtang dingtang jatrangni gisepo ding·chaogrikaniko ra·baani cholrang donge kenchakna nanganiko ong·atenga ine Tura MDC parakataha.
“Niam gri napsrukanirangko champengna sorkarini kam ka·aniko anga mittelna namnika indiba District Council-ni ning·o MDC-rangba, gipin jatrangna name sandichenggija TNT licence-rangko on·enga. GHADC-o kam ka·giparangna ja 43 batpile dormaharangko on·na man·jaengon, MDC-rangni iandakgipa kamrangko nikna man·skaenga,” ine Marak parakataha.
A·kawe jolrango gipin jatrangko Village Court aro Council-ni membor dake songaniara Sixth Schedule-ni miksonganikon pe·ani gita ong·engaha ine janapatskaengon, Assam-o niam gri songdongenggiparangko a·rikgalengmiting somoirango Meghalaya a·dokni simarango niam gri napsrukanirangko champengatenba, ia jolrango songdongenggipa Tribal-rangna chel·chakanirangko on·china, a·kawe jolrango Nokmarangna on·gimin bilrangko man·piltaina gita pattarangko name nipiltaichina, ADC-ni ning·o gipin jatrangko membor dake songaniko dontongatchina gita Tura-ni MDC, a·dokni Chief Minister-ko didiataha.