SHILLONG: Songadam nokadamrango manderangni janggi tangani gadangko nambatatna gita Pradhan Mantri Janjatiya Vikas Mission (PMJVM)-ni ning·o dingtangmancha Rural Empowerment Summit-ko Sukrobar salo, Shillong songjinmani State Convention Centre-o ong·ataha aro ia program-ko ong·atanio a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia Summit ba tom·aniko Meghalaya Basin Development Society ong·ataha aro ia tom·anio, a·dokni Agriculture & Farmers Welfare Minister Ampareen Lyngdoh-ba dongpae bak ra·angaha.
Ia program-ko ong·atanio, a·dokni dingtang dingtang Van Dhan Vikas Kendra (VDVK)-rangna gimik gong kror 3.90-ni cheque-rangkoba sualatjolaha.
Ia program-ko ong·atanio a·dokni Chief Minister, tom·anio bak ra·giparangna aganprakangengon, songadam nokadamrango donggipa manderangni janggi tanganiko dingtangatna gita sorkari, dingtang dingtang program-rangko a·bachengate on·anichi bang·a manderangni janggi tanganiko dingtangatna man·aha ine parakataha.
A·doko dol 55,000-mangni gita self help group (SHG)-rangko bikotaha ine janapatengon, ia SHG-rango bakko ra·e sak lak bongamangni gita me·chikrang, an·tangtangni janggi tanganio dingtanganiko ra·bana man·aha ineba Chief Minister aganaha.
A·doko dol 22,000 farmers producer group-rangna sorkari, tangka paisani gita dakchakanirangko on·enga ine janapatengon, ia producer group-rango bak ra·enggipa lakgnimangni gita game ge·e cha·giparang, da·alo an·tangtangni man·gnirangko changgni bariatna man·engaha ine Chief Minister aganaha.
Songo noko game ge·e cha·giparangna sorkarini a·bachengatgipa dingtang dingtang program-rang, jekai CM Assure, CM Farm Plus aro uandakgipa program-rangni giminba ia tom·anio Chief Minister, jinmana agan-talate on·angaha.
Ia program-ko ong·atanio a·dokni Agriculture & Farmers Welfare Minister Ampareen Lyngdoh-ba jinmana aganprakengon, Pradhan Mantri Van Dhan Yojana (PMVDY)-ni ning·o dol 169 Van Dhan Vikas Kendra (VDVK)-rangko kulie on·anichi a·dok gimikni sak 50,000 manderang namgnirangko man·engaha ine parakataha.
