SHILLONG: Ma·mong sorkarini manderangko Public Distribution System (PDS)-ni ning·o uamangni ration card-ko Aadhaar card baksa nangdimatna ge·etaniko on·a ja·man Meghalaya-ni ge 1000 baten nokdangrang uamangni ra·bigipa ration card-ko walpilaha.
Ration card-ko Aadhaar baksa nangdimatna ge·etani miksonganiara scheme-ko nambate ra·gatna aro nokli ba cha·bokanirangko nirok-sandina ong·a. Aadhaar-ko nangdimate KYC-ni kamrangko ka·anga ja·man king 1000 baten ration card-ko on·pilaha ine Food and Civil Supplies Minister Comingone Ymbon aganaha.
East Khasi Hills-o ge 600 card, Ri Bhoi-o ge 400, South West Khasi Hills-o ge 100 card-rangko walpilaha.
Aadhaar-ko nangdimate eKYC dakaon scheme-ko man·a kragijagipa beneficiary-rangko u·ina man·aha. Unbaksana nokli ration card-ko jakkalgipa aro sorkario kam ka·giparangba ration card-ko jakkalako u·ina man·aha. Iandakgipa ja·kuko de·aniara scheme-o cha·bokanirangko bon·atgen.
Ration card baksa Aadhaar-ko nangdimatna gita ma·mong sorkari, June 30 tarikona somoiko donahachim indiba a·doko 63.5 percent beneficiary-rangsan Aadhaar-ko nangdimatkuenga. Jemangan Aadhaar-ko on·kujaenga uamangna August jaona somoiko on·kuenga.
PDS, ian ma·mong sorkarini scheme ong·a, uni gimin Aadhaar-ko nangdimatna nangtela ine Ymbon aganaha.
