Tura: West Garo Hills-ni Tikrikilla, Dalu aro Dadenggre block-rangoni dol 10 Integrated Village Cooperatives Societies (IVCS), 19.725 MT-ni golmorisko pale kror 1.24 kamaiaha, ian Meghalaya-na dal·bea chu·sokani ong·a.
Golmoris palatgipa IVCS-rangara- Pringprang IVCS, Migasal IVCS, Chichang IVCS, Jangrapara IVCS, Rengsinpara IVCS, Chengaldare IVCS, Chandisila IVCS, Thallang IVCS, Bugi IVCS aro Kumonggrik IVCS- iarang ong·a.
Ian golmoris game cha·giparangna gisik nangbee kam ka·aniko mesoka aro uamangna dal·bea chu·sokani ong·a. Batanggimin bilsi 2023-oba golmoris-ni dam kg prakon 450-ona tang·doaha. Da·ode kg-prako gong 631-ona gadoskaha. Bilsi 2025-o 40 percent-ona baridapaha. Dam rakbatani orotoara, golmoris ge·a gamanio nambata cholrangko man·ani gimin aro Meghalaya sorkarini agri-valule chain-ni gita palna gita nambata biaprangko sandie on·ahani gimin ong·a.
Game cha·giparang sakpraknan kg 100-ko on·gile, ia consignment-chi komibeoba sak 200 game cha·giparangni janggi tanganio nangchakeaha, uamangni man·gniko baridapataha.
West Garo Hill-oni watatgipa golmorisko Everest Masala Company (Mumbai)-na uamangni supplier Sundardas Rathansey Spices Private Limited, Mumbai-ni gita palatgen. Ian Meghalaya-ni game cha·giparangna India-ni mongsonggipa company-rang baksa kam ka·rimna cholko on·aha.
Iana IVCS-ni dilgiparang Meghalaya-ni Chief Minister Conrad K Sangma-ko unbaksana Meghalaya Basin Management Agency-ni Horticulture Department, Cooperation Department aro MCAB Bank-ko dakchakanina mittelangaha. West Garo Hills-ni District Horticulture Officer Smt. Thera Ch. Marak, golmorisni consignment-ko Nangrime IVCS Ltd, Tikrikilla-oniko Mumbai-ona watatgipako oprakate on·aha.
Ia chu·sokaniara Meghalaya-ni farmer cooperative-rangko bilakatna, post-harvest infrastructure, high-value crop-ko namdapatna re·mikkangani bak ong·a.
