TURA: Manderangna sanna bananirangko on·anio chu·sokgipa ong·engani gimin West Garo Hills a·jani Babadam Primary Health Centre (PHC)-na India sorkarini Health & Family Welfare Ministry-ni gita National Quality Assurance Standards (NQAS) certification-ko on·aha.
Ia NQAS certification-ara Quality Council of India (QCI)-ni ning·o sanna banani, sabisi sakanchirangko chel·chakani, rongtal an·talani aro dangdike on·aniko nina National Health Systems Resource Centre (NHSRC)-ni tarigipa chol ong·a aro Garo Hills gimiko Babadam PHC-an NQAS certification-ko man·chenggipaba ong·aha.
Ia chu·sokaniko man·ahani gimin Babadam PHC-ni Health Program Manager Sr Riya, talataniko on·angengon, “Ian Isolni pattiani, bimchipe kamrangko ka·ani aro PHC-o kam ka·enggipa pilak manderangni on·kange kam ka·ani bite ong·a ine chinga bebera·a. Chinga rongtal an·talgipa, sagiparang baksa meligipa aro sanna bananirango namgipa health centre-ko ong·atna ku·cholsan kamko ka·aha. Ia NQAS certification-ko man·aniara chingni manderangna rakbate kamrangko ka·angkuna chingko didiani ong·a,” ine parakataha.
Meghalaya Health Systems Strengthening Project (MHSSP)-ni ning·o a·bachengatgipa aro World Bank-ni dakchakenggipa Internal Performance Agreement (IPA) model-ni ning·o seokako man·gipa dam 122 health centre-rangoni ia Babadam PHC-ba damsa ong·a.
