SONGSAK: Meghalaya a·dokni skanggipa Centrifuged Latex Manufacturing Unit-ko Sombar salo, a·dokni Chief Minister Conrad K Sangma, East Garo Hills a·jani Songsak C&RD Block ning·o donggipa Koksi Nengsat songo nokdonggae on·aha aro ia karkanako nokdonggaanio, a·dokni PHE Minister Marcuise N Marak, Mendipathar-ni MLA Marthon Sangma, East Garo Hills a·jani Deputy Commissioner RP Marak, Superintendent of Police (SP) Steven Rynjah, Mendipathar Multipurpose Cooperative Society (MMCS)-ni secretary Sr Rose aro gipinrangba dongpae bak ra·angtokaha.
Ia karkanako kulina gita Meghalaya Basin Management Agency-ni ning·o a·dok sorkari, gong crore 18.8 tangkarangko chame on·aha aro ia karkanako MMCS-ni founder aro secretary Sr Rose jako ra·e rikaha.
Ia rubber tariani karkanako nokdonggae on·anganio a·dokni Chief Minister, jinmana aganprakangengon, ia karkanako kulianichi Garo Hills-o rubber bagan dake cha·enggipa manderangna bang·en namgniko ra·bagnok ine an·tangtangni man·enggipa rubber-rangko ia karkanana palskachina rubber bagen dake cha·enggipa manderangko didiangaha.
A·doko game ge·e cha·enggipa manderangni namgnina sorkari, FOCUS, FOCUS+, CM Farm+ aro uandakgipa dingtang dingtang scheme aro program-rangko a·bachengate on·aha ineba Chief Minister aganaha.
Meghalaya a·doko bang·bata manderangan gama ge·anirango pangchake janggi tanggiparang ong·ani gimin game ge·e cha·giparangni man·gniko changgnina baten bariatna nangenga ineba Sangma aganaha.
Meghalaya a·dokko Billion dollar 10 economy ong·atna nisan donako chu·sokatna gita game ge·e cha·enggipa manderangni janggi tanganiko namdapatna aro cholrangko on·na nangenga ineba Chief Minister aganaha.
Ia Centrifuged Latex Manufacturing Unit-ko nokdonggana gita program-ko ong·atanio a·dokni Chief Minister, Meghalaya a·dokni skanggipa fruit dehydration unit-naba Koksi Nengsat songo pangchakaniko songe on·angjolaha.
Ia fruit dehydration unit-ko gong crore 23 korosrangchi rikna sienga aro ia karkanako re·baenggipa 2026 bilsini November jao matchotgen ine u·iataha.
