RESUBELPARA: Mikkango donge kam ka·enggiparangko, self help group (SHG)-rangko aro official-rangko mande ra·pilskana gita Mongolbar salo, Sampoornata Abhiyan Samman Samaroh-ko North Garo Hills a·jani Mendipathar-o donggipa Mingchengram Field-o ong·atangaha.
Ia program-ko ong·atani miksonganiara, namroro silroroani grigipa biaprango manderangni janggi tangani gadangko ra·dona gita kam ka·enggipa pilak dolrangni chu·sokaniko manianian ong·a.
Aspirational Block Program-o susana gita seokako man·gipa a·song gimikni dam 500 block-rangoni Resubelpara C&RD Block-ba damsa ong·paahani gimin ia Sampoornata Abhiyan program-ko NITI Aayog, 2024 bilsio North Garo Hills a·jaoba a·bachengatahachim.
Ia program-ko ong·atanio, Meghalaya Legislative Assembly-ni Deputy Speaker aro Resubelpara-ni MLA Timothy D Shira, mongsonggipa sokgipa ong·e jinmana aganprakangengon, namroro silroroani dongkugijagipa biaprango manderangni janggi tangani gadangko nambatatna kamrangko ka·ahani gimin Block aro dingtang dingtang department-ni official-rangko mittelpilangaha. North Garo Hills a·jao pilakni gitan namroro silroroaniko ra·bana gita pilak dolrangkon nangrime kam ka·angkuchina gitaba ua didiangaha.
Ia program-ko ong·atanio, dingtang dingtang official-rangna, manderangna aro dolrangna Resubelpara-ni MLA Timothy D Shira aro Mendipathar-ni MLA Marthon J Sangma-ni jakchi certificate-rangko suale on·angjolaha.
Ia program-o dingtang dingtang self help group-rangni tarigipa bosturangkoba manderangna mesokangjolaha.
Free health screening, MHIS enrollment aro gipin program-rangkoba ia salo ong·atangjolaha.
Ia program-o dongpae jinmana aganprakanggipa gipin manderangara, Mendipathar-ni MLA Marthon J Sangma, North Garo Hills-ni Deputy Commissioner Dr Abhishek Saini aro Resubelpara C&RD Block-ni BDO Liam TG Momin ong·a.
