SHILLONG: Assam a·dokni Karbi Anglong, Meghalaya-ni Garo Hills aro Tripura-o dingtang a·dokko dabienggipa Tribal dolrang, re·baenggipa August jao, Delhi-ona re·ange, jingjengatanirangko dakna tik ka·angaha.
Iani bidingo National Federation for New States (NFNS)-ni dilgiparang, Budbar salo Shillong-o tom·e chanchirimangenba, re·baenggipa August jao, dingtang a·dokna dabie jingjengatna tik ka·angaha.
NFNS-ni u·iatani gitade, uamang Delhi-o donggipa Jantar Mantar-o jinma asonge, an·tangtangni dabianirangko knachakchina ma·mong sorkario dabianggen.
Ia tom·anio, NFNS-ni vice president aro Garo Hills Autonomous District Council (GHADC)-ni Deputy Chief Executive Membor Nikman Ch Marak, NFNS-ni general secretary aro Joint Action Committee for Autonomous State (JACAS) of Karbi Anglong-ni membor Stalyn Ingty baksana dingtang dingtang dilgiparangba bak ra·angtokaha.
NFNS-o bakrimenggipa dolrangara, Garo Hills-oni Garoland State Movement Committee (GSMC), Tripura-oni Indigenous People’s Front of Tripura (IPFT), Khasi Hills-oni Hill State People’s Democratic Party (HSPDP), Assam Karbi Anglong-oni JACAS aro gipinrang ong·a.
“Chinga August 20 tarikni ja·man Delhi-o dal·begipa jingjengataniko ong·atna tik ka·aha. Ian chingni gital dabianirang ong·ja maina skangonin Karbi Anglong, Garo Hills aro Tripura-o Tribal-rangna dingtang a·dokko dabianirang donga,” ine NFNS-ni general secretary Stalyn Ingty aganaha.
Ingty-ni aganani gitade, South India-o Telangana a·dokna dabiani chu·sokgipa ong·aha indiba salgro salaram a·dokrango songdongenggipa Tribal-rangni dabianirangkode ma·mong sorkari knachakkujaenga.
Delhi-o jingjengataniko dakanio manderangni bakrimaniko am·na gita NFNS-ni tom·aniko Tura, Karbi Anglong, Delhi, Vidarbha aro Tripura-o ong·ataha ineba ua aganaha.
Indake ong·engon, August 23 tarikni ja·man uamang, Union Home Minister Amit Shah-ko gronge agangrikna gita somoiko ra·na miksongenga ine NFNS-ni vice president aro GHADC-ni Deputy CEM Nikman Ch Marak parakatskaaha.
Dingtang a·dokko dabienggipa Tribal dolrang, Delhi-o jingjengatgen
Date:
Share post:
