SHILLONG: Meghalaya a·doko napsruke songdong a·chaaniko champengna gita Meghalaya Residents Safety & Security Act (MRSSA) 2016-an chu·onga ine a·dokni Cabinet Minister aro BJP-ni dilgipa AL Hek-ni agananiko Hynniewtrep Youth Council (HYC) raken jegalataha.
Iani bidingo kobor ra·timgipa manderang baksa agangrikengon, MRSSA 2016-o niam gri napsrukako champengna gitade dongimin niamrang dongja indiba a·doko songdongenggipa manderangko nirokani niamrangsan dongaia ine Budbar salo, HYC-ni president Roy Kupar Synrem parakataha.
“Niam gri napsrukbaenggipa manderangko maikai MRSSA-chi champengna man·gen chingade ma·sija. Ia niamode gipin biaprangoni niam gri napsrukbaenggiparangko champengani kattaan dongja,” ine Synrem aganaha.
Niam gri napsrukaniko MRSSA-ni champengsona man·gen ine aganengani gimin a·dokni Cabinet Minister AL Hek aro gipinrangkoba, MRSSA 2016-ko name poraichina HYC didiataha.
HYC president-ni aganani gitade, MRSSA-ni Section 17 aro 18-ni ning·o Facilitation Centre-rangko songani bidingo kachariba name nipiltaiahachim.
Umling, Umroi Airport aro Mendipathar Railway Station-o kuligipa facilitation centre-rangko COVID-19 sajinmani somoio gipin biaprangoni re·bagipa manderangko porikka ra·chakna gita a·dok sorkari Health department-na pakwatamanaha ineba Synrem aganaha.
“Sajinmarang bon·angani ja·man ia centre-rangko galchipaiaha aro da·o maming kamrangnan cholijaengaha,” ine ua aganaha.
MRSSA-de a·doko songdongenggipa manderangna nok parani niamrangkosan donaia ine janapatengon, ia niamchide gipin biaprangoni napsrukbaenggipa manderangko champengsona man·jawa ine Synrem parakataha.
“Cabinet Minister-ni agangipa kattarangara, Inner Line Permit (ILP) gita dakgipa niamrangko dabienggipa Tribak manderangko dilsretna jotton ka·ani gitasan ong·aia,” ine HYC president parakataha.