SHILLONG: Garo Hills Autonomous District Council (GHADC)-o kam ka·enggiparangna ja 42 batpile dormaharangko on·na man·jaengani gimin GHADC-o Governor’s Rule-ko ra·gatchina ba Governor-chi chalaiskachina gita a·dokni Congress dol, a·dok sorkariko didiataha.
Bilsi gittam batpile dormaharangko man·kujaengani a·sel GHADC-o kam ka·enggipa manderang neng·nikanirangko chagrongna nangtokengaha ine Meghalaya Pradesh Congress Committee (MPCC)-ni working president Deborah C Marak parakataha.
“GHADC-o kam ka·enggiparang changni chang, an·tangtangni man·na nangenggipa dormaharangna dabitokenga indiba da·alona kingkingan uamangna ku·rachakaniko on·na man·jaenga. Uamang, an·tangtangni dormaharangko dabie, ramarango re·jomaha, office-ni a·palrango asonge jijngjengataha indiba maming dakchakanirangko on·na man·jaenga. Uamang gam-jinrangkode dabienga ong·ja indiba an·tangtangni nokdangko aldupana gitasa an·tangtangni man·gnirangko on·china dabienga,” ine Marak aganaha.
GHADC-o kam ka·giparangna on·na nangkuenggipa dormaharang da·o ja 42 batangpilengahaoba, uamangna ku·rachakanirangko pe·aha aro adita salrangna skang, uamangna jagnini dormahako on·na ku·rachakaniba da·o gimaangaha ine Marak aganaha.
GHADC-o kam ka·giparangni duk mikchi salantian batroroengaha ine janapatengon, GHADC-ko chalaienggipa Executive Committee-ni kam cholijani gimin aro kam ka·giparangna ka·sachakaniko mesokjaengani gimin MPCC-ni working president, a·dok sorkarikoba matnangataha.
GHADC-o tangka paisarangko jakkalsreta, miksonge on·atgipa tangka paisarangko dingtang kamrangna jakkala aro mongsonggipa department-rangni kajinarangko jakkalsreta ine MDC-rangoniko knasona man·engani gimin janapatengon, manderangni seokgimin Executive Committee, an·tangtangni daitokon chu·sokatna man·jaengaha ong·ode, GHADC-ko Governor-chi chalaianian nambatgipa ong·enga ine Marak parakataha.
“Ian GHADC-o kam ka·enggipa manderangni hajalni hajal nokdangrangna ka·dimeaniko on·na didiani ong·enga. GHADC-o Governor’s Rule-ko dikdiksa somoirangna, council-ni tangka paisa koros ka·anirangko hisapna, nangana batpile gro dongenggipa dormaharangko on·na, sorkario ka·donganiko ra·bapilna aro gital election-ko name ong·attaina didiani ong·enga,” ine Marak parakataha.
GHADC-ko tangatpilani cholde Governor’s Rule-ko ra·gatana agrede gipin chol dongjaha ine MPCC-ni working president aganaha.