RESUBELPARA: North Garo Hills a·jani Resubelpara Government Higher Secondary School aro PWD (Roads) Resubelpara Division Executive Engineer-ni gital rikgipa nokrangko Budbar salo, a·dokni Chief Minister Conrad K Sangma, nokdonggae on·angaha.
Resubelpara Govt HS School-ni gital nokko nokdonggae on·anganio a·dokni Chief Minister, jinmana aganprakangengon, ia gital skul nokko rikdapanichi chatro chatrirang, an·tangtangni lekka porako nambate ra·na man·gnok ine parakangaha.
A·doko lekka porani gadangko pilakni gitan namdapatna sorkari kam ka·enga ine janapatengon, dongsogimin skul nokrangko nambate taridapna gita gong kror 700 tangkarangko chamataha ine Chief Minister parakataha.
“Dam 2500 sorkari skulrangoni dam 2000 LP, UP, higher secondary skulrangko namdapatna seokmanaha,” ine ua aganaha.
A·dokna a·gilsakni seng·aniko on·anio an·tangtangko on·kange kam ka·angkuchina gita ua skigiparangko aro management committee-koba didiangaha.
PWD (Roads) Resubelpara Division-ni Executive Engineer-na gital office building-ko nokdonggae on·angskaengon, ia gital office nokko rikanichi PWD department, nambate kamrangko ka·na man·gnok aro ian jolo songdongenggipa manderangna namgniko ra·baskana man·gen ine aganaha.
Ia gital nokrangko nokdonggae on·anganio dongpae bak ra·anggipa gipin manderangara, Meghalaya Assembly-ni Deputy Speaker Timothy D Shira, PHE Minister Marcuise N Marak, dingtang dingtang MLA-rang, District Administration-ni official-rang aro gipinrang ong·a.
