AMPATI: South West Garo Hills a·jao District Medical & Health Officer (DM&HO) ong·e kamko ka·enggipa mande, kamtangko name ka·jaenga ine matnangenba, ia DM&HO-ko dingtang biapona apjitate, sakgipin officer-ko ra·baskachina A·chik Holistic Awakening Movement (AHAM) South Western Zone (SWZ), a·dok sorkario dabiangaha.
AHAM-SWZ-ni president Wester G Sangma-ni parakatani gitade, South West Garo Hills a·jao DM&HO ong·e kamko ka·enggipa mande, sanna banani kamrangko ka·dilgipa ong·e, national health scheme-rangko aro dingtang dingtang kamrangko nirokna nangengoba, mitam kamrangko ka·anio chu·sokgipa ong·na man·skajaengachim.
“Chingni nikani gitade, ia DM&HO-ni ning·o Health department-ni kamrango parak ong·ani dongjaenga aro an·seng baljokani kamrangoba maming namdapanirang dongjaenga. Uni gimin SWGH a·jani DM&HO-ko manderangni namgnina gipin biapona ra·jitange, uni biapo sakgipin officer-ko ra·baskana nanga,” ine AHAM-SWZ-ni president parakatenba, ia officer-ko kam ra·jitani bidingo maming ja·kurangko de·jagenchimode jasani ja·man AHAM, nanga gita ja·kurangko de·anggen ine mikrakataniko on·angaha.
2012 bilsionin South West Garo Hills a·jao District Sports Officer (DSO)-koba dual charge-osa donenga ine janapatskaengon, iandake biap damgniko nirokna nangengani a·selan South West Garo Hills a·jani DSO, antio salgnirangsan office-o dongna man·enga ine AHAM-SWZ parakatenba, chadamberangni aro kal·susaanio gisik nanggipa manderangni namgnina full time DSO-ko on·na nanga ine sorkario dabiangaha.