SHILLONG: Meghalaya a·doko Tuberculosis saaniko bon·atna ja·ku de·anio, jaantian changgni dake National Tuberculosis Elimination Program (NTEP) baksa tom·e, obostarangko nipilronggen ine a·dokni Governor CH Vijayashankar parakataha.
Meghalaya a·doko NTEP-ni kamrangni gimin National Health Mission (NHM)-ni State Mission Director Ramakrishna Chitturi, a·dokni Governor-na agan-talatanirangko on·angaha.
Meghalaya a·dokko TB-oni jakgitel ong·atna kamko ka·anio chagrongna nangenggipa neng·nikanirangko aro kamrangko nipilna gita Budbar salo a·dokni Governor-ni dilanichi dingtangmancha tom·aniko Raj Bhavan-o ong·atangaha aro ia tom·anio a·dokni Governor, Health official-rang baksa chanchirimangengon, Raj Bhavan-ni gita pilak nanga dakchakanirangko on·na aro jadokna a·doko TB saenggipa sak 150 manderangna nangchongmotgipa cha·ani ringanirangko on·na ku·rachakaniko on·angaha.
Songsalna dangdike on·anide pattiani aro rongtalgipa kamsa ong·a ineba Vijayashankar aganaha.
“An·ching ku·cholsan ong·e ka·sachakani aro miksongani gnang re·chakatode pilak ra·bianirangkon an·ching chena man·aigen,” ine Governor aganaha.
A·doko TB saaniko bon·atna man·na gita TB-na porikka ra·aniko bariatchina, TB-ni bidingo health program-rangko ong·atjringchina, sagipa manderangna Nikshay Poshan Yojana-ni namgnirangko aro cha·ani bosturangko somoi gita on·china, skul, college aro dingtang dingtang gittimrango awareness program ong·atanirangko mangrakbatatchina gitaba a·dokni Governor didiangaha.