TURA: Re·anggipa Budbar salo, Shillong-ni Meghalaya AIDS Control Society (MACS), Don Bosco College-ni NSS Unit aro Red Ribbon Club baksa nangrime, Zonal Level Red Ribbon Youth Fest-ko Tura-ni Don Bosco College-o ong·atangaha.
HIV/AIDS sabisini bidingo, an·tangtangni be·en bimangrangna simsakna nangani bidingo aro an·chirangko on·gilani gamchatani bidingo chadamberangna u·iataniko on·na miksonganio ia Youth Fest-ko ong·ataha.
Ia Red Ribbon Youth Fest-ko ong·atanio, Tura Civil Hospital-ni Senior Health & Medical Officer aro Blood Centre-ni In-charge Dr Tami G Momin, mongsonggipa sokgipa ong·e jinmana aganprakangengon, HIV/AIDS sabisiko chel·chakanio an·tangtangan an·chirangko on·gilna nangani gimin aganangaha.
Ia program-o Tura ICTC & ART Centre-ni Senior Specialist aro Nodal Officer Dr Rajamoni R Marak-ba jinmana aganprakengon, HIV/AIDS sabisiko chel·chakanio chadamberangni dakna nanggnirangko agan-talate on·angaha.
Ia Youth Fest-ko ong·atanio jinmana aganprakanggipa gipin manderangara, Tura Don Bosco College-ni Principal Rev Fr Januarius S Sangma, Education department-ni Asst Professor Dr Mueller Beul M Sangma, MACS-ni official Larina Nongpiur, Red Ribbon Club-ni Nodal Officer Jordana Dipera R Marak aro gipinrang ong·a.
Ia youth fest-ko ong·atani bak gita Red Ribbon Quiz Competition-koba chatro chatrirangna ong·atangaha aro ia quiz competition-ko Ksanbor Kharkongor dakdilangaha.
