TURA: West Garo Hills a·jani a·kawe jolo, Phulbari Forest Office-oni Rajabala-ona dakanggipa rama namsrangjahani a·sel songni nokni manderang aro ramako re·ruraenggipa manderang neng·nikanirangko chagrongna nangtokenga ine A·chik Dedicated Integrity Leaders (ADIL) Phulbari Western Zone aro Chibinang sub-unit parakatenba, ia ramako ta·raken taripile on·china PWD (Roads) NEC Sub-Division No.1 Phulbari-ni Sub-Divisional Officer (SDO)-na sedoataha.
ADIL dolni parakatani gitade, Phulbari Forest Office-oni Rajabala-ona dakanggipa rama gimikan a·kolrara dake nosto ong·tokaha aro mitam bakrangode gari gorarang re·na namsrangjae, a·sel ong·anirangkoba chagrongna nangtokenga.
“Phulbari Forest Office-oni Rajabala-ona dakanggipa rama namsrangjahani gimin chinga nang·na chingni suk ong·gijaniko seachi parakatenga. Ia janapgimin rama gimikan a·kolrara dake nosto ong·tokaha aro mitam ramarangde gari gorarang re·na man·jae, a·sel ong·anirangkoba nikna man·enga,” ine ADIL dol parakatenba, ia ramako ta·raken tarie on·china PWD (Roads) NEC Sub-Division No.1 Phulbari-ni Sub-Divisional Officer (SDO)-ko didiataha.
