TURA: West Garo Hills a·jani Phulbari Community Health Centre (CHC)-o kam ka·enggipa dentist, kamtangchi re·rongja aro kamtangko name ka·jaenga ine matnangenba A·chik Dedicated Integrity Leaders (ADIL) Western Zone Phulbari, Chibinang Sub-Unit baksa Phulbari-ni medical officer in-charge-na badi ka·doangaha.
Iani bidingo Phulbari CHC-ni officer-in-charge-na badi ka·e sedoatengon, ia jolrango wagam sagipa manderang bang·a changon, sanna bananiko ra·na gita CHC-ona re·anggenchimoba dentist dongrongjani a·sel sanna bananirangko ra·na man·rongja aro ja·manchakesa sanna bananirangko ra·na nangronga ine ADIL dol matnangataha.
“Phulbari CHC-o kam ka·enggipa dentist, kamtangchi re·rongjani a·selan sagipa manderang, sanna bananirangko ra·na man·rongja aro Assam-onasa re·ange sanna bananirangko ra·na nangronga. Uni gimin iani bidingo sandirokenba, CHC-ni dentist kamtangko name ka·na gita ja·kurangko de·china chinga mol·molenga,” ine ADIL Western Zone Phulbari aro Chibinang Sub-Unit-ni dilgiparang, Phulbari CHC-ni medical officer-in-charge-na sedoatgipa chittio janapataha.
