Congress ga·akana MPCC-ni president-ko matnangna man·jawa: Deborah

SHILLONG: Dal·begipa gitcham Congress party jean changsao Meghalaya a·dokko sason ka·gipa aro ge-17 seat-rango chegipa ga·akaha aro ian MPCC-ni President-ni biapko Vincent Pala-ni jako ra·aoni 2021 bilsio dal·begipa gitcham party-o membor-rang gimarikrikangna a·bachengaha.
2021 bilsini August jao jensalo Vincent Pala, MPCC-ni President ong·e jako ra·aha aro Dr. Mukul Sangma aro uni gisepgriko meligrikgijaniko darangan ma·sitokachim, apsan bilsio Dr. Mukul Sangma sak 13 MLA-rang baksa party-oni ong·kataha aro TMC-o napaha.
Dongrikenggipa party-ni legislator-rang MDA sorkariona re·mikkangna a·bachengaha aro mitam MLA-rangko dondipatako man·giparang napangaha aro mitam MLA-rang dingtang political party-rango bakrimangaha.
Iarang gimikna President saksa mangmangko matnangna man·jawa ine party-o ong·enggipa obostarangna MPCC working president Deborah Marak aganchakangaha.
“An·ching gimikan apsan daito ra·gipa ong·e ua saksa mangmang maiko dakgen,” ine Marak, party-ni MLA-rang party-ko watanganina aro uamang oppostion-o dongkuna nangnikgijagipa ong·e uamang an·tangtangni man·gnina sorkari baksa bakrimanganina aganangaha.
2023 bilsio Assembly election-o ge-5 seat-rango komibee Congress man·aha aro political-oni party maming saloba nampilna man·jawaha jeon party saknaaniko man·aha.
Seat ge-5 party chegipa ong·e, MLA-rangoni saksa Saleng Sangma Tura MP election-o susana chanchiaha arp ua bang·a margin-rangchi election-o cheaha.
Saleng Sangma-ni cheani ja·man Gambegre seat bangbang ong·gipana bye-election-ko ong·ataha aro Congress seat-oniko NPP ra·sekaha.
House-o seat 60-oni Congress dolo sak 4 MLA-rangsan dongrikaiaha, NPP, party-ko bak dakna man·angaha aro party-ni sak 3 MLA-rang Dr Celestine Lyngdoh, Gabriel Wahlang aro Charles Marngar party wataha aro batanggimin bilsio NPP-o bakrimangaha.
Ronnie V Lyngdoh-mangmang Congress party-o saksa mangmang ong·e chadengachim ukoba NPP- party-o napatna NPP man·aha, meja batanggimin salrangoni Meghalaya a·doko Congress MLA-rang saksaba dongjaha.