SHILLONG: A·dok sorkari Jaintia Hills Autonomous District Council (JHADC)-na bilsi 2025-2026 financial year-o man·gipa mineral aro vehicle tax-oni man·gipa kajinarangoniko uamangni revenue share kror 35 tangkako on·aha.
Sorkarini watgipa tangkako JHADC, council-o kam ka·enggipa hajal manderangni dormahako on·na man·gnok, jemangan ru·uta somoirangoni dormahakon man·gija dongenga. District Council Affairs Department, Finance Department (EC-II)-ni ra·chakaniko man·a ja·man sanction order-ko on·aha. Sanction order-ko JHADC Chief Executive Member (CEM) Thombor Shiwat, Deputy CEM Lasky Rymbai, aro Planning Board Chairman Moonlight Pariat-mangnaba State Deputy Chief Minister Sniawbhalang Dhar -ni gita sokataha.
Indake ong·engon fund-ko Treasury-ona wataha aro kam ka·giparangna dormahako on·na gita kamrangko a·bachengataha ine CEM Thombor Shiwat, aganaha. Council-o kam ka·giparangna dormahako aro pension-ko on·na gita japrakon Council, kror 8.45 tangkako nanga. Kajinani share-ko man·sona ru·utani gimin sak 1,100 baten council-o kam ka·giaprangni dormahako somoi gita on·na man·jahachim. Batanggimin jasnioni kam ka·giaprang dormahako man·jaha.
Uandake kror 35-ni grant-ara Executive Committee-ni kam ka·anirango altubatatgen, council-o batanggimin somoirangoni tangka dongjani a·sel neng·nikarangko man·engachim.
Meja July 24 tariko Summer Session-ko ong·atao dormahako on·na ru·utani bidingo political dolni dilgiparang jajrenganiko parakaha. MDC-rangba batanggimin jagittam somoinin dormahako man·kujaenga.
