SHILLONG: Adita salrangna skang, Congress dolni saksamangmang dongkuenggipa MLA-ba National People’s Party (NPP)-o napangani ja·man political party-rangni candidate-rangko name seokna nangani gimin aro party-ni gisepo ku·mong nangrimaniko rakkina nangani gimin Opposition dolni dilgipa Mukul Sangma janapataha.
Political party-rangko dilani aro politics-ni kamrangna on·kangani bidingo janapatengon, politics-ni kamko ka·na napanide manderangna dangdike on·asan ong·aigija neng·nikanirangko man·batengmiting somoirango kim·kim ong·e chadengna man·anikosa miksonga ine Sangma parakataha.
Election-rango susana gita candidate-rangko susaanio ka·dongna man·gipa manderangkosa seokna nanga ine janapatskaengon, je manderangkon an·tangtang baksa susana seokengachim, uandakgipa manderangara silchidareko goatchengna skangan katpilgipa ong·na nangja ine Opposition dolni dilgipa aganaha.
Sangma-ni aganani gitade, politics-ni kamara sakgipinrang baksa agangrikjringani, chakchikrakna man·ani aro salantian an·tangni neng·nikanirangko namatna man·na nanganisa ong·a.
 |
|