TURA: Adita salrangna skang, Tura-ni Araimile Police Station-o chadambe saksako kragija dake sasti on·e roa ine matnanga man·enggipa police officer-ni kosako rakgipa ja·kurangko de·na aro ia officer-ko kamoniko suspend ka·na gita West Garo Hills a·jani Superintendent of Police (SP) ku·rachakaniko on·ataha.
Iani bidingo, sasti on·e roako man·gipa chadambeni ma·gipa, dos dakgipa police officer-ni kosako badi ka·doangani ja·man, ia police officer-ni kosako rakgipa ja·kurangko de·na SP ku·rachakaniko on·ataha.
Ia ma·gipani police-rangna FIR ka·anio janapatani gitade, uni depante drugs jakkalgipa aro palgiparang baksa golmal ong·ani gimin re·anggipa July-ni 30 tariko badi ka·aniko man·aha aro ua an·tangan an·tangni depanteko sandie, development committee-ni dilgipako okamate, uni depanteko aro golmal ong·gipao donggipa mandeko police station-ona rimange on·enba, doka man·gipa aro uni pagipa baksa ia a·selni bidingo agan-golpogrikaha. Dolgnini gisepo agan-golpogrike, nanga kamrangko matchotatenba uni depanteko medical check up ka·manani ja·man walni 12:30 bajimango uamang nokona re·angpilaha ine chadambeni ma·gipa FIR-o janapaha.
“Salgipino, chong·motan July-ni 31 tarik pring 10:00 bajimango correction-na okamatako man·e angni depanteko police station-ona rimangpilaha aro ua somoio doka man·gipa pagipa an·tangan, an·tangni police-rangna ka·gipa case-koba withdraw ka·aha. Indake August-ni 1 tariko sign ka·mane noktangona namen re·bapilaha indiba August-ni 2 tarik pring 10:00 bajio correction-na re·angako police office CM Marak, chu peke, salgimik cha·ani ringani on·gija angni depanteko sasti on·e roaha aro uko lock-up-o chipe donaba ka·mikkenataha. Medical-na rimangani somoioba dokani an·chi kamgiparangko mesokjachina ua beng·aha. Attamni 3:00 bajimango, nokona sokangani ja·man rama re·na man·jani gimin sing·osa ua police officer-ni doke sate roako aganaha,” ine chadambeni ma·gipa FIR-o parakataha.
Iani bidingo West Garo Hills a·jani SP-o sing·sandiaton, ia police officer-ni kosako department-ni gita rakgipa ja·kurangko de·gen aro uko Sombar sal dipet kamoni dontongatgen ine ku·rachakaniko on·ataha.
Officer-in-Charge (OC)-ni report-o pangchake, ia officer-ni kosako departmental inquiry-ko dakanggen ineba SP parakataha.