GHADC-na ma·mongoni chamatgipa tangka paisarangko jakkalsreta inako sandirokchina Tura MDC dabia

TURA: Garo Hills Autonomous District Council (GHADC)-na 15^th Finance Commission-ni ning·o chamatgipa tangka paisarango jakkalsreta ine matnanganirangko man·ahani gimin iani bidingo jakgitele sandirokaniko dakatchina gita Tura-ni MDC aro BJP-ni state vice president Bernard N Marak, a·dokni Chief Minister Conrad K Sangma-na sedoataha.

Chief Minister-na sedoatgipa chittio Marak-ni parakatani gitade, GHADC-ni Executive Membor Finance In-charge ong·enggipa mandean, ma·mong sorkarini chamatgipa tangka paisarangko, dormaha on·na aro District Council-ni gipin korosrangna jakkalchengaha ine parakahachim. Iako GHADC-ni EM Finance I/c, YouTube channel-o interview ra·engmiting somoio ku·rachakahachim.

Una agre, GHADC-ni gipin Executive Membor-rangba, minggipin interview ra·anio, RTI ka·anio gong kror 161 tangkarangko man·soaha inakoba jegalskaahachim.

15^th Finance Commission-ni ning·o GHADC-na chamatgipa tangka paisarangko gipin kamrangna jakkalaha ine a·kanganiara, 15^th Finance Commission-ni dongimin niamrangko pe·ani gita ong·aha ine janapatengon, RTI ka·e man·aniko gipin Executive membor-rangni jegalaniara jajrengna nanganiko ra·baani ong·skaenga ine Tura MDC aro BJP-ni state vice president parakataha.

“Iandake Executive Committee-ko chalaigiparangni agananio dingtanggrikaniara GHADC-ko chalaianio jajrengna nanganiko ong·atenga. Iako NPP-chi dilenggipa sorkari, ong·jaode NPP-chi dilenggipa Executive Committee-an kakketko dongnuna jotton ka·enga. Interview ra·anio Executive Membor-rangni jegalaniara RTI-na aganchakanio aro tangka paisa chamatanio ong·gijaniko mesokanisa ong·enga. Unbaksana bilsignina Motor Vehicle tax record donggijaniko RTI ka·e man·aniba, iarangni bidingo sandirokna nanganiko mesokani ong·enga,” ine Marak parakataha.

Executive Membor-rangni a·kangani aro jegalanirangko jakgitele sandirokatchina Chief Minister-ko mol·molatengon, iani bidingo maming ja·kurangko de·jagenchimode GHADC-ni mikkimko rakkina aro Sixth Schedule-ni ning·o on·gimin niam bidikko rakkina ua chubata gadangona re·ange badi ka·skana draatako man·gen ine Tura MDC aro BJP-ni state vice president Bernard Marak, mikrakataniko on·angaha.