TURA: West Garo Hills a·jani Selsella C&RD Block ning·o donggipa Mandagre aro Nokatgre songrango, Village Organisation (VO)-ni gital office-rangko nokdongaaha. Ia VO office-rangko, MGNREGA scheme-ni ning·o Village Employment Council (VEC)-rangni rakbee kamko ka·anichi rikna man·aha.
Ia VO office-rangko nokdonggaanio, Selsella constituency-ni MLA Arbinstone B Marak, mongsonggipa sokgipa ong·e bak ra·angaha aro unbaksana Selsella Block-ni BDO Emanuel M Sangma, West Garo Hills MSRLS-ni District Program Manager Michelle Momin, MSRLS Selsella-ni Block Program Manager Jenny Frestha Marak aro gipinrangba dongpae bak ra·angaha.
Ia VO office nokrangko nokdonggae on·anganio Selsella MLA Arbinstone Marak, jinmana aganprakangengon, ia gital office nokrangko name jakkalchina aro sorkarini on·enggipa dingtang dingtang cholrangko sandie ra·china gita VO-rangko aro songni nokni manderangko didiangaha.
2032 bilsini gisepo Meghalaya a·dokko billion dollar 10 economy ong·atna niksamsoani baksa a·dokni Chief Minister Conrad K Sangma kamrangko ka·enga ine ia miksongani baksa songo noko namroro silroroaniko ra·bana gita bakrime kam ka·chinaba Marak didiangaha.
A·dok sorkarini ra·gatgipa CM Elevate aro dingtang dingtang program-rangni namgniko ra·china gitaba ua, songni chadamberangko aro self help group (SHG) membor-rangko didiangaha.
Ia VO office nokrangko rikanio, BAKDIL-chi chalaienggipa Selsella Block Mission Management Unit (BMMU), Meghalaya State Rural Livelihoods Society (MSRLS) baksa nangrime dakchakanirangko on·aha.