TURA: Robibar salpaksachibara, Tura-ni samba jolo donggipa Sella Wariko re·batangna jotton ka·engmiting somoio, South West Garo Hills a·jani Ampati-o Agriculture Officer ong·e kam ka·enggipa Teseng M Sangma-ko, bilakbee jokenggipa chi man·angaha.
Koborko on·ani gitade, ia mandeara, Araimile Police Station-ni ning·o donggipa Dolampong sambani MBOSE jolo sondongenggipa mande ong·achim aro ua somoio ua an·tangni nokdang baksa Sella Wario rona re·angahachim.
Chiko batangengmiting somoio Sangma-ko ta·rakbee jokenggipa chi man·pakangaha aro uko man·pakangani ja·man uko dingtang dingtang dolrang sandibeahaoba, ia koborko seatengmiting somoiona kingkingan man·pilkujaenga.
Sangma-ko sandianio, songni manderang baksana Fire & Emergency Service, Tura Police aro gipinrangba bak ra·paaha.
Sangma-ko Robibar wal 7:30 bajionade chirangoniko sandiahachim indiba walahani gimin sandianiko dontongchengna nangaiaha aro uko Sombar pringoni sanditaina tik ka·angaha ine West Garo Hills a·jani Superintendent of Police (SP) Abraham T Sangma parakataha.
Sonibar walgimikan mikkarang jimbee waangahani a·sel Garo Hills gimikon chirangni dal·aniko nikna man·aha aro Sella Warini Ganol chibimaba Robibar salo namen ta·rakbeaha.