BAGHMARA: Garo Hills-ni bang·a biaprangon skul nokrang namsrangjani a·sel poraienggipa chatro chatrirang aro skigiparang neng·nikanirangko chagrongna nangtokengon, South Garo Hills a·jaoba skul nokrang namsrangjani a·selan apsan dakgipa neng·nikanirangko chagrongna nangtokenga.
Ia songbadna kobor on·timgipa mande saksa, Baghmara-oni kilometre 35-mang chel·ao donggipa Dimagre songona re·angon, ia songo skul damgnini obosta namsranggijaniko nikna man·taiaha.
Skanggipa skulara, Dimagre SSA UP skul ong·a aro gnigipa skulara Dimagre SSA LP skul ong·a. Dimagre SSA UP skulo sak 27 chatro chatrirang donga aro ia skulo skigipa sakbri, chatro chatrirangna, skie on·paenga.
Ia skulo class 6-oni class 8-ona kuturi dambri donga aro kuturi damsakode kam ka·giparangna office dake jakkalenga. Ia kuturi ge·bongaoni staff room-mangmangsan mikka sela gri ong·e, ia kuturion, skulni pilak nanga lekka ki·tap aro nangchongmotgipa bosturangkoba donchakenga ine u·iataha.
Re·anggipa bilsiosan ia skulko, skulna chame on·gipaa gong 10,000 tangkarangchi taridapahachim ineba koborko on·aha. Ia tangkakora, skulni nanga bosturang, jekai duster, chalk, pen, rubber, blackboard aro uandakgipa bosturangko brenasa on·ahachim indiba skul nok namsrangjahani gimin ia tangkarangchi skul nokko taridapna nangaha ine u·iataha.
Bang·gija tangka paisarangchisa skul nokko taridapaiahani gimin taridapgipa nokking da·on selna a·bachengpiltaiaha aro mikka waahaode class-rangko ra·na man·taijaengaha ine kobor on·aha.
Mikka selprupruani a·selan, skulo poraienggipa bi·sarang, ran·kalgipa biaposa tom·dake asongna nangtokenga ineba u·iataha.
Ia skul nokni bang·bata kuturirangon kelki aro do·garangba namsrangjaha maina kelki do·garang bang·batan nosto ong·tokaha aro mitamde be·aha ineba kobor on·timgipa parakataha.
Ia skulni bidingo headmaster-o sing·on, uamang changni chang education official-rangna badi ka·doatahachim indiba skulna on·gimin gong 10,000 tangkachisa taridapchina aganaiaha ine headmaster parakataha.
“Gong 10,000 tangkachi bolrang, tinrang aro gipin nanga bosturangkon brena chu·ongja aro kam ka·giparangni korosrangba dongkuenga. Indide maikai indita tangkachi ia skul nokko name taridapna man·gen?” ine skulni headmaster sing·doataha.
Ia skulni apsan barion, Dimagre SSA LP skulba donga aro ia skulo sak 37 chatro chatrirangna skigipa sakgni skie on·skaenga.
SSA UP skul nok gitan ia LP skul nokni obostaba namjabatroroenganiko nikna man·aha.
Ia skul nokni nokkingko pingipa tinrang sokmanjae, mikka waahaode chirang selpruprue, classroom-rangosa chirang gapengaha ine u·iataha. Ia skul noko kuturi ge·gittam donga aro ge·gnikode classroom dake jakkalenba, ge·sakode storeroom dake jakkalengachim indiba ia kuturi ge·gittaman mikkarang sele, class-rangko ra·na aro bosturangko donchaknamangmangba namjaengaha ine kobor on·timgipa parakataha.
Iani ja·man, Dimagre songoni km 20-mang chel·ao donggipa Dubagre songona re·angskaon, ia songoba Dubagre Govt LP skul aro SSA UP skulko nikna man·eaha.
Ia skul damgnina kuturirang ge·bri dongachim indiba kuturi ge·gnide namsrangjani gimin galchipahani a·sel da·o ia skul damgnina kuturi ge·gnikosan jakkalna man·aiengaha ine u·iataha.
LP section-ni skul nokde gitalkalkuengani gimin namkalengkua indiba UP section-ni kuturide nokkingrango samsirang chana a·bachengskaengaha.
Kobor on·timgipani u·iatani gitade, LP section-o sak 40 chatro chatrirangna skigipa sakgni skie on·enga aro UP section-ode sak 21 chatro chatrirangna skigipa sakbri skie on·enga.
Ia skul damgnina kuturi ge·gnisan dongaiahani gimin LP section-ko pringo aro UP section-ko salpaksa ka·na nangskaengaha ineba kobor on·aha.
“Chinga ia skul nokni bidingo baditaba chang badi ka·doangaha aro skul nokko aro compound-ko photo ka·e mesokchinaba chingko aganaha. Indiba skul nokko tarina gita tangka paisarang dongkujaenga ine department-ni official-rang chingna u·iatenba, LP skulna chamatgipa gong 25,000 aro UP section-na chamatgipa gong 10,000 annual grant-ko jakkalchina aganataha. Indiba ia tangka paisarangara skul nokko taridapna chu·ongpagenma?” ine skulni skigiparang sing·doataha.
Ia skulo poraienggipa bi·sarang komiangroroengani giminba skulni skigiparang suk ong·gijaniko parakattokaha.
