SHILLONG: Indore songjinmao bading chiwalgipa Raja Raghuvanshi-ko Sohra jolo so·ote galanina uni jikgipa Sonam aro uni ‘mikchagipa’ Raj Kushwaha-ko Shillong-ni kachari, Sonibar saloni sal 14-na judicial custody ning·o dondapattaiaha.
Ia ge·etaniko kachari, August 1 tariko on·ataha aro iana skang July-ni 31 tarikoba kachari, Raja Raghuvanshi-ko so·otanina matnanga man·enggipa mande sakgittam, chong·motan Akash Rajput, Anand Kurmi aro Vishal Chauhan-koba sal 14-na judicial custody-o donkuchina rai on·ataha.
Raja Raghuvanshi-ko so·otanina police-rang, da·o dipet gimik sakchet manderangko rim·ahachim aro uamangara, Sonam Raghuvanshi, Raj Kushwaha, Akash Rajput, Anand Kurmi, Vishal Chauhan, Shilom James, Balbir Ahirbar aro Sonam-ni dongnuchakgipa nokni nokgipa Lokendra Singh Tomar ong·achim.
Shilom James, Balbir Ahirbar aro Lokendra Singh Tomar-nade kachari, jaminko on·skaaha.
Indore songjinmaoni bia ka·daldale re·bagipa Raja Raghuvanshi aro Sonam-ni gimaangaoni salchetni ja·man June 2 tariko Raja-ni sogimin manggisiko, Sohra jolo donggipa Wei Sawdong Falls sambaoniko man·ahachim. Raja-ni manggisiko man·ani ja·man Meghalaya Police, SIT-ko songe, ia a·selni bidingo sandirokna a·bachengaha aro ia mandeko so·otanina uni jikgipa Sonam, uni mikchagipa Raj Kushwaha aro uamangni so·otna tik ka·gipa mande sakgittamko rim·na man·aha.