AMPATI: Bilsi sokgija dambe me·trarangni an·o dongani, Prevention of Children from Sexual Offence (POCSO) Act aro chadamberangni pekatgipa samrangko jakkalani namgijaniko chatro chatrirangna agan-talate on·na gita adita salrangna skang, Ampati Government Higher Secondary School-ni awareness program-ko ong·atangaha.
Ia awareness program-ko ong·atanio, Child Helpline Counsellor Pangchak Marak aro Counsellor Gripse D Sangma, mongsonggipa skigiparang ong·e, chatro chatrirangna kosako janapgimin kattarang bichongrangni bidingo agan-talatanirangko on·angaha.
Ia program-ko ong·atanio chatro chatrirangni ma·sina sike sing·anirangnaba uamang agan-talatanirangko on·angjolaha.
Ia sal somoirango bilsi sokgija me·a me·chikrang, til·ek an·chae roanirangchi, seng·gnangan bi·sa ba·e, janggi tanganio nosto ong·anirangko nikna man·engani gimin aro chadamberangni gisepo pekatgipa bosturangko jakkalanirang batroroengani gimin skulo poraienggipa chatro chatrirangna mikrakataniko on·na ia awareness program-ko ong·atangaha.