TURA: West Garo Hills a·jani a·kawe jolrango, mongsongbate Selsella aro Batabari block-ni ning·o donggipa secondary aro higher secondary skulrango Garo subject-ko skigiparang dongjani a·sel Garo subject-ko ra·enggipa chatro chatrirang neng·nikanirangko chagrongna nangtokenga ine A·chik Progressive Approach (APA) dol parakataha.
Iani bidingo West Garo Hills a·jani District School Education Officer (DSEO)-na seachi u·iatengon, Garo ku·sikara Meghalaya a·dokni mingsa official language ong·an baksana mongsonggipa subject-rangoni mingsa ong·genchimoba a·kawe jolrango donggipa bang·a skulrangon Garo skigiparang dongjani a·sel poraienggipa chatro chatrirang, mongsongbate board porikkarangna tarisoenggipa chatro chatrirang neng·nikanirangko chagrongna nangtokenga ine APA Balachanda-ni president Amol R Marak parakataha.
“Ia skulrango Garo subject-ko skigiparang dongjani a·sel chatro chatrirangni poraianirango nangchakeaniko ra·baan baksana ian Meghalaya a·doko mingsa official language-ko dal·e ra·gijani aro ripingna gisik nanggijaniko mesokani ong·enga,” ine APA-ni president parakataha.
Garo subject-ko poraienggipa chatro chatrirangni namgnina ia pilak secondary aro higher secondary skulrango ta·raken Garo skigiparangko ra·na gita ge·etaniko on·china gitaba APA, West Garo Hills a·jani DSEO-ko didiataha.