SHILLONG: Adita salrangna skang, Kerala a·dokni Catholic Sister sakgni, chong·motan Preethi Mary aro Vandana Francis-ko Chhattisgarh a·doko rim·anina aro a·song gimikon Kristianrangko dokkol ka·e rona jotton ka·engani gimin jegale Sombar salo, Meghalaya Pradesh Youth Congress (MPYC) aro Meghalaya Pradesh Mahila Congress (MPMC), Shillong songjinmani Laitumkhrah-o donggipa Don Bosco Square-o jingjengatanirangko dakangaha.
Ia jingjengataniko dakanio, MPYC-ni vice president Banphira Basaiawmoit, kobor ra·timgiparangna talataniko on·angengon, a·songni chonchongipa jat aro toromrangko dokkol ka·e rona gita ma·mong sorkari, Hindu dolrangna bilrangko on·enga ine BJP sorkariko matnangataha.
“An·chingni Meghalaya a·dokode an·ching je toromkoba ja·rikna aro aganprakna jakgitel ong·en man·engkua indiba ma·mongode an·chingko BJP-sa sinjetna aro dokkol ka·na jotton ka·enga. Sing·anide an·ching baditana an·chingni bebera·atangko jakgitele manina aro ja·rikna man·gen maina a·songni gipin bakrangode ian kakket ong·bebeengaha,” ine Basaiawmoit aganaha.
Ia jingjengataniko dakanichi Congress dol, jat aro toromni gisepo ding·chaogrikaniko aro meligrikgijaniko ra·bana miksongenga ong·ja indiba a·songni pilak biaprangon Kristianrangko chadrapani aro kal·ake rona jotton ka·anirang batroroengahani giminsa jegale ia jingjengataniko ong·ataha ineba MPYC-ni vice president talataniko on·angaha.
Congress dolde pilak jat aro toromna chakgiparangsa ong·a ine talataniko on·angengon, chonchongipa jat aro toromrangni kosako iandake sinjetna jotton ka·aniko uamang mikkangchiba jegalangkuaigen ine Basaiawmoit parakataha.
Indake ong·engon, MPCC-ni general secretary Manuel Badwar-ba a·songni kosako iandake BJP-ni politics kal·na jotton ka·aniara an·tangtangni man·gnina dakasan ong·aia ine matnangataha.