TURA: Gasuapara aro Dalu jolrango bijoli sirongani a·selan jolo songdongenggipa manderang, mongsongbate poraienggipa chatro chatrirang, neng·nikanirangko chagrongna nangtokenga ine A·chik Dedicated Leaders (ADIL) Gasuapara aro Dalu regional unit-rang parakatenba, ia jolrango bijoliko nambate on·china department official-rangko didiataha.
ADIL Gasuapara aro Dalu unit-rangni parakatani gitade, ia jolrango bijoli sirongengani a·selan dingtang dingtang kamrangko ka·e cha·enggipa manderang aro poraienggipa chatro chatrirang neng·nikanirangko chagrongna nangtokengachim.
Gasuapara aro Dalu jol damgnion bijolirangko nambate nirokna aro nosto ong·an somoirango ta·rake taripile on·na man·na gita ia biap damgnion lineman-rangko ra·dapchina gitaba ADIL dol didiataha.
Ia jolrango bijoli silitingrango be·dape bijoliko nosto ka·rongengani gimin bol cheksirangko aro sambao donggipa bolrangko den·e galchina gitaba ADIL didiataha.
Mikka balwa ta·rakani somoirangoba bijolirang golmal ong·atako man·jana gita nom·gipa bijoli krongrangni biapo gital krongrangko songskachina gitaba ADIL didiataha.