SHILLONG: Meghalaya a·doko drugs ba pekatgipa sam jakkalani aro badingsrukaniko champengna sorkari bilakbee kamrangko ka·engon, Sombar saloba Assam Darrang a·jaoni niam gri sam badingenggipa mande sakgniko West Jaintia Hills a·jaoniko rim·na man·aha aro ia manderangoniko gram 50 ong·gipa heroin samrangko man·aha.
Sam badingenggipa manderangni bidingo koborko man·soani ja·man Anti Narcotics Task Force (ANTF)-ni official-rang, West Jaintia Hills a·jani police-rang baksa, Jowai Police Station-ni ning·o nirikkianirangko daksoenba, ia mande sakgniko rim·na man·aha.
Police-rangni u·iatani gitade, ia manderang, Silchar-oni Shillong-ona bus gario re·baengachim aro ia bus gariko Sombar pringni 4:00 bajimango West Jaintia Hills a·jao neng·takatenba, ia mande sakgniko rim·na man·aha.
Ia mande sakgnioniko am·sandion saksaoniko sabon case ge·gni aro sakgipinoniko sabon case ge·gittimo chipe ra·baenggipa heroin samrangko man·aha ine u·iataha.
Iani bidingo Jowai Police Station-o mokordomako segatenba, sam badingsrukanio jak donggipa gipin manderangkoba rim·na sandirokengkua ine police official-rang parakataha.