SHILLONG: Re·anggipa Robibar walo, East Khasi Hills a·jani Pynursla jolo donggipa Rngain jolo, Maruti Alto gari bolsa, a·kuangchina ga·akonange a·sel ong·aha aro ia a·sel ong·anio sakbonga manderang an·tangtangni janggiko gimaatna nangaha.
Ia gari a·sel ong·anio sianggipa manderangara nokdang ge·sanoni ong·a aro uamang, Langkydem songoni ong·achim. Sianggipa manderangara, bilsi 65 ong·gipa nokdangni ma·dot Alida Marbaniang, uni bilsi 28 ong·gipa depante Ador Marbaniang, uni sakgipin bilsi 23 ong·gipa depante Aimiki Marbaniang, Meban Ador-ni bilsi 22 ong·gipa jikgipa Risbun Kurbah aro uamangni bilsisa jabonga ong·kuenggipa demechik Damebanshngain Kurbah ong·achim.
Police-rangni u·iatani gitade, a·sel ong·ani ja·man Sombar pringonin a·selo ga·akgipa manderangko jokatna police-rang kam ka·aha indiba rasong gribee Sombar attamchibarasa sianggipa manderangni manggisirangko man·aiaha.
Uamangni songreengmiting somoio mikkarang jime waani a·sel aro a·arang be·ani a·sel ia gari, feet 70 ong·e chugipa a·kuangchina ga·akonangakon ineba police-rang chanchichipenga.