SHILLONG: Meghalaya a·doko Trinamool Congress (TMC)-ko bilakbatatna gita maming chanchianirang dongja ine TMC-ni saksa dilgipa aro Opposition dolko dilgipa Mukul Sangma, chinko mesokahani gimin a·doko TMC bon·changani cholrang dongaiaha.
TMC-ko Meghalaya a·doko 2021 bilsini November jao, Mukul Sangma aro Charles Pyngrope gita dakgipa dilgiparangko man·chape sak 12 MLA-rang baksa bikotchengahachim indiba da·o ia party-ko bilakbatatna maming ja·ku de·ani ba chanchianirangba dongjani gimin ian a·doko bon·ani cholrang dongaiaha.
Sangma-ni aganani gitade, Meghalaya a·doko TMC-ko a·bachengataonin party-ko dal·roroatna ba bilakroroatna gita gisiko nange kam ka·anirangba dongjachim.
Election-ni somoirangosan TMC, gisiko nange kamrangko ka·a gita ong·aia ine janapatengon, ua aro uni ka·rimskarang TMC-o napchengani somoioba gisiko nangen kamrangko ka·dilachim indiba party-ko bilakatna gita man·chipjaha.
Meghalaya a·doko TMC-ko a·bachengmiting somoirangode bang·a manderangan party-ona salbaako man·ahachim indiba party-ko dal·roroatna ba bilakroroatna gita gisiko nange kam ka·anirang dongjahani a·sel ia party ka·sinsin bilgriangpilaha ineba ua aganaha.
Ua TMC-on dongkuna miksongengama gipin ramako re·na miksonganirang donga ine sing·anina aganchakaniko on·angskaengon, uni mongsonggipa daitode saksa MLA ong·e aro Opposition dolko dilgipa ong·e manderangna dangdike on·anian ong·ani gimin da·o dipet ia kamko chu·sokatanian uni daito ong·enga ine Sangma parakataha.
Gambegre by-election-o bilakbee susagrikani gimin gisik ra·atpilaniko on·angengon, ua somoio TMC-ni bilakaniko susana gita sorkariko chalaiaenggipa party (NPP), a·dokni Chief Minister Conrad K Sangma baksana mongsonggipa dilgiparangkon, adita somoirangna Gambegre constituency-o donkamna nangpilaha ine Sangma aganaha.
A·dokni aro a·doko songdongenggipa manderangni nangnikani gitasa ua mikkangchi jekoba chanchie ja·ku de·anggen ineba Sangma aganaha.