TURA: Re·anggipa Robibar salpaksachibara, an·tangni nokdang baksa Sella Wario rona re·anggipa Ampati-ni Agriculture Officer Teseng M Sangma-ko Sombar saloba dingtang dingtang dolrang, songni manderang baksa salgimik chioniko sandibeahaoba man·pilkujaenga.
Koborko on·ani gitade, ia mandeara, Araimile Police Station-ni ning·o donggipa Dolampong sambani MBOSE jolo sondongenggipa mande ong·achim aro ua somoio ua an·tangni nokdang baksa Sella Wario rona re·angahachim.
Ia mandeko chi man·pakangani ja·man, State Disaster Response Force (SDRF), Special Rescue Team (SRT), Fire & Emergency Service, Police aro jolo songdongenggipa manderangba Robibar walonan aro Sombar pringnian sandiahaoba ia koborko seatengmiting somoionan man·pilkujaenga.
Police official-rangni u·iatani gitade, ia mandeko chi man·pakangani gimin ka·majolrango donggipa police station-rang, jekai Damalgre aro Garobadha police station-rangonaba kobor on·ataha indiba da·onan ia mandeni bidingo maming kobor dongkujaenga.
Koborko on·ani gitade, Robibar attamo, ia mandeko chi man·anggipaoni adita chel·kala biapo songni manderang, chio manggisi balboa gita dake nikrikahachim indiba ua somoio walahani gimin aro mikkarang wae chirang dal·baroroengani gimin sandianiko dontongchengna nangaiaha.
Robibar walonan ia mandeko sandia nikjae, Sombar pring 6:00 bajimangonin sipai dolrang, songni manderang baksa ia mandeko sandina a·bachengpiltaiaha indiba rasong gribee Sombar walonan ia mandeko man·pilkujaenga.
Batanggimin salrango dongtonggija mikkarang waanganichi Ganol chibima rang·san dal·baaha aro chirang namen ta·rakengani a·sel gimaenggipa mandeko sandianio neng·nikanirangko chagrongna nangenga ine police official-rang parakataha.
Gimaenggipa mandeko Mongolbar pringoni sandina a·bachengpiltaigen ineba police official-rang u·iataha.